ڈی جی آئی ایس پی آرنے آج اہم نیوز کانفرنس کرتے ہوئے بتایا کہ بنوں میں فوج نے ریسپانس ایس او پیزکے مطابق بالکل درست دیا، امن مارچ میں کچھ مسلح لوگ پہلے سے شامل تھے۔

ڈی جی آئی ایس پی آر لیفٹیننٹ جنرل احمد شریف چوہدری نے اہم نیوز کانفرنس کرتے ہوئے کہا کہ فوٹیج میں دیکھا جاسکتا ہے کہ بہت سے مظاہرین کے پاس اسلحہ ہے، بنوں واقعے میں ہمارے 8 جوان شہید ہوئے، تمام دہشت گردوں کو جہنم واصل کردیا گیا۔

ترجمان پاک فوج نے کہا کہ سپاہی ثوبان نے اپنے آپ کو گرنیڈ پر ڈال دیا تاکہ باقی لوگ بچ جائیں، اگلے دن بنوں کے لوگوں نے کہا ہم امن مارچ کریں گے، اس امن مارچ میں کچھ مسلح لوگ پہلے سے شامل تھے، ایک عارضی دیوار کو بھی وہاں گرایا گیا اور سپلائی ڈپو کو بھی لوٹا گیا، تاجروں کے امن مارچ میں کچھ مخصوص عناصرشامل ہوئے، اس جگہ سے ایک کلومیٹر دور مسلح افراد نے فائرنگ کی اور جانی نقصان ہوا۔

پریس کانفرنس کے دوران بنوں واقعے کی فوٹیج چلائی گئی

ڈی جی آئی ایس پی آر نے کہا کہ بنوں میں فوج نے ریسپانس ایس او پیزکے مطابق بالکل درست دیا، اگرکوئی انتشاری ٹولہ آتا ہے تو اس کو پہلے وارننگ دی جاتی ہے پھر ہوائی فائرنگ کی جاتی ہے، اگر وہ انتشاری ٹولہ نہ رکے تو پھراس کے ساتھ جو کرنا ہو وہ کیا جاتا ہے، 9 مئی کرنے والے، سہولتکار، منصوبہ سازوں کو ڈھیل دیں گے تو ملک میں یہ فسطایت پھیلے گی۔

’’عزمِ استحکام آپریشن کو متنازع بنانا مافیا کی چال ہے‘‘

انھوں نے کہا کہ ہجوم کو کنٹرول کرنا فوج کی ذمے داری نہیں صوبائی حکومت کی ذمے داری ہے، بنوں کا واقعہ ہوا اس پرعوام کا پُرامن احتجاج ہوا، بالکل ہونا چاہیے، ان دہشت گردوں کے خلاف مارچ کریں بالکل کریں۔

ترجمان پاک فوج نے کہا کہ جیسے ہی یہ واقعہ ہوتا ہے سوشل میڈیا پر ہنگامہ کھڑا دیا جاتا ہے، ڈیجیٹل دہشت گرد کس طرح اصل دہشت گردوں کو سپورٹ کر رہے ہیں۔ آڈیو کال میں خارجی نور ولی کو سنا جاسکتا ہے کہ وہ کیا کہہ رہا ہے، نورولی آڈیو میں کہہ رہا ہے اسکول، اسپتال، گھراڑاؤ، دھماکے کرو لیکن میرا نام نہیں آنا چاہیے، ان میں اتنا ظرف نہیں کہ کہہ سکیں کہ ہم ذمے داری لیتے ہیں۔