وزیراعظم شہبازشریف نے کہا ہے کہ عالمی اورعلاقائی امور پرپاکستان اورآذربائیجان کےخیالات میں ہم آہنگی ہے، صدرآذربائیجان نے کہا کہ آذربائیجان کے ہرمشکل وقت میں پاکستان نے ساتھ دیا۔ 

اسلام آباد میں وزیراعظم شہبازشریف نے پاکستان اورآذربائجان کے درمیان جوائٹ پریس سٹیک آؤٹ کے موقع پرخطاب کرتے ہوئے کہا کہ صدرالہام علیوف اوران کے وفد کو پاکستان آمد پرخوش آمدید کہتا ہوں، پاکستان کےعوام آپ کے دورے سے بہت خوش ہیں۔

وزیراعظم شہبازشریف نے کہا کہ آذربائیجان کےدورے میں الہام علیوف نے بہترین مہمان داری کی، ہماری آج کی بات چیت باہمی اعتماد اوراحترام پرمبنی تھی، ہم نے تجارت سمیت مختلف شعبوں میں تعاون کوفروغ دینا ہے، پاکستان اورآذربائیجان کے درمیان تجارتی حجم 100 ملین ڈالرہے۔

وزیراعظم نے خطاب میں کہا کہ دونوں ممالک کے درمیان تجارتی حجم ہماری قریبی دوستی کاعکاس نہیں، ہمیں باہمی تجارتی حجم میں اضافہ کرنا ہے، دونوں ملکوں کومختلف شعبوں میں مشترکہ منصوبوں کوفروغ دینا ہے، ہماری سوچ یکساں ہے، عالمی اورعلاقائی امورپرپاکستان اورآذربائیجان کےخیالات میں ہم آہنگی ہے۔

وزیراعظم شہبازشریف نے کہا کہ تمام اہم مسائل پرہم ایک دوسرے کے مؤقف کی حمایت کرتے ہیں، پاکستان نے ہمیشہ آذربائیجان کے کازکی حمایت کی ہے، آذربائیجان کا کشمیرکے بارے میں اصولی مؤقف کا خیرمقدم کرتے ہیں، مختلف شعبوں میں 2 ارب ڈالرکی مشترکہ سرمایہ کاری کےمنصوبوں پربات ہوئی۔

وزیراعظم نے مزید اپنے خطاب میں کہا کہ باکو کاپ 29 کا انعقاد ہورہا ہے، کاپ 29 ترقی پذیرملکوں کیلئے فائدہ مند ثابت ہوگی۔

اس موقع پر صدرآذربائیجان الہام علیوف نے کہا کہ نوازشریف کا دل سے احترام کرتا ہوں، 17 سال قبل پاکستان کا دورہ کیا تھا، نواز شریف اُس وقت وزارت عظمیٰ کے منصب پرفائزتھے۔

صدرالہام علیوف نے کہا کہ کشمیرکے مؤقف کی حمایت ہماری محبت کا اظہار ہے، کشمیرسے متعلق قراردادوں پرعملدرآمد نہیں ہو رہا، آذربائیجان کے ہرمشکل وقت میں پاکستان نے ساتھ دیا۔

یہ خبربھی پڑھیں؛ پاکستان اور آذربائجان کے درمیان مختلف شعبوں میں تعاون کی مفاہمتی یادداشتوں پر دستخط