کراچی: آئی پی پیز کے کیپیسٹی چارجز کے معاملے پر ایف پی سی سی آئی نے سپریم کورٹ اور ایس آئی ایف سی سے رجوع کرنے کا فیصلہ کرلیا۔

ایف پی سی سی آئی کے قائم مقام صدر عبدالمہیمن خان کا کہنا ہے کہ ملکی معیشت کو بچانے کے لیے معاملے کو اعلیٰ فورمز پر پیش کریں گے، کاروباری برادری کو مشاورتی عمل میں شامل نہیں کیا جارہا ہے۔

قائم مقام صدر کہتے ہیں کہ ایف پی سی سی آئی نے پاور سیکٹر سے متعلق چارٹر آف ڈیمانڈ پیش کردیا ہے، آزاد پاور پروڈیوسرز کے فرانزک آڈٹ کا حکم دیا جائے۔

ایف پی سی سی آئی چارٹرڈ آف ڈیمانڈ میں کہا گیا ہے کہ کیپیسٹی چارجز کو ختم کیا جائے، صرف جنریٹ کی جانے والی بجلی کی ادائیگی کی جائے اور آئی پی پیز کے ساتھ بجلی خریداری کے معاہدے ازسرنو کیے جائیں۔

عبدالمہیمن خان نے کہا کہ معاہدوں پر نظرثانی کے لیے منصفانہ طریقہ کار اپنایا جائے، عوام نے مالی سال 2024 میں 2000 ارب روپے کے کیپسٹی چارجز ادا کیے ہیں۔

انہوں نے بتایا کہ اگر صورتحال برقرار رہی تو کیپسٹی چارجز 2025 میں بڑھ کر 2700 سے 2800 ارب ہوجائیں گے لہذا آئی پی پیز معاہدوں کا جامع جائزہ لیا جائے۔

ایف پی سی سی آئی نے مزید کہا کہ قانونی حدود کے اندر قیمتوں کا ازسر نو تعین کیا جائے، اوور انوائسنگ کو روکنے کے لیے نگرانی کی اشد ضرورت ہے۔