ایک جانب پاکستان میں بڑھتی مہنگائی نے عوام کی زندگی مشکل کردی ہے اور دوسری جانب کراچی کو دنیا کا سستا ترین شہر قرار دے دیا گیا۔

جی ہاں ایک ڈیٹا کمپنی نمبیو کے مطابق  پاکستان کے تین شہر دنیا کے پانچ سستے ترین شہروں میں شامل ہیں۔

نمبیو کی جانب سے یہ دعویٰ  طرز زندگی کے اخراجات کی سالانہ فہرست میں کیا گیا ہے۔

اس فہرست میں جنوری سے جون 2024 تک کے ڈیٹا کی جانچ پڑتال کی گئی اور نیویارک شہر کو بنیاد بنایا گیا ہے۔

طرز زندگی کے اخراجات، کرائے، طرز زندگی کے اخراجات بشمول کرائے، سودا سلف، ہوٹلوں کی قیمتیں اور مقامی افراد کی قوت خرید جیسے شعبوں کو مدنظر رکھ کر دنیا بھر کے 218 شہروں کی درجہ بندی کی گئی۔

اس فہرست کے مطابق دنیا کا سستا ترین شہر کراچی ہے جو نیویارک کے مقابلے میں 81 فیصد سستا ہے جس کے بعد لاہور دوسرا سستا ترین شہر ہے۔

بھارتی شہر کولکتہ  تیسرے نمبر پر ہے جبکہ اسلام آباد کو دنیا کا چوتھا سستا ترین شہر قرار دیا گیا  ہے۔

اس کے برعکس سوئٹزر لینڈ کے شہر جنیوا کو دنیا کا مہنگا ترین شہر قرار دیا گیا  ہے۔   دوسرے نمبر پر  بھی سوئس شہر زیورخ رہا جبکہ تیسرے پر نیویارک کو رکھا گیا ہے۔

امریکی شہر سان فرانسسکو کے حصے میں چوتھا نمبر آیا جبکہ بوسٹن 5 واں مہنگا ترین شہر قرار دیا گیا۔