کراچی میں اربن فلڈنگ کے خدشے کے پیش نظر این ڈی ایم اے نے الرٹ جاری کر دیا ہے۔

این ڈی ایم اے نے کراچی کے لیے اپنی نئی ایڈوائزری جاری کردی ہے جس کے مطابق شہر قائد کو اربن فلڈنگ کا خطرہ ہے، اور اگلے 2 دن میں ممکنہ بارشوں کے باعث کراچی ڈویژن میں اربن فلڈنگ کا خطرہ ظاہر کیا گیا ہے۔

محکمہ موسمیات کے مطابق کراچی ڈویژن میں آج سے 6 اگست تک گرج چمک کے ساتھ بارشوں کا امکان ہے۔

این ڈی ایم اے کا کہنا ہے کہ کراچی میں موسلادھار بارشیں اربن فلڈنگ اور سیلابی صورتحال کا باعث بن سکتی ہیں۔

ایڈوائزری میں کہا گیا ہے کہ شہر قائد کے باسی موسم کی اپ ڈیٹس اور الرٹس سے باخبر رہیں۔

این ڈی ایم اے نے پاک این ڈی ایم اے ڈیزاسٹر الرٹ ایپلی کیشن لانچ کی ہے جو کہ گوگل پلے اسٹور اور آئی او ایس ایپ اسٹور پر دستیاب ہے۔

این ڈی ایم اے ایپ پر عوام کے لیے بروقت الرٹس،  قدرتی آ فات سے نمٹنے کیلئے حفاظتی تدابیر اور گائیڈ لائنز موجود ہیں۔

اربن فلڈنگ کے اثرات سے بچنے کے لیے نشیبی علاقوں کے رہائشی چھتوں اور کھڑکیوں کو مناسب طریقے سے واٹر پروف بنائیں اور برساتی پانی جمع ہونے سے بچنے کے لیے خصوصی اقدامات اٹھائیں۔ گٹر اور نکاسی  آب کے نظام کو مؤثر بنائیں۔

 کسی بھی  کمزور انفرااسٹرکچر کو محفوظ کر لیں جو تیز ہواؤں اور تیز بارش سے نقصان کا باعث بن سکتا ہے،  سیلابی پانی میں چلنے، تیرنے یا گاڑی چلانے سے گریز کریں۔

سیلابی علاقوں سے بچنے کے لیے متبادل راستے استعمال کریں۔  کھلے مین ہولز اور رکاوٹوں سے آگاہ رہیں.

 تیز بارش کے دوران شارٹ سرکٹ سے بچنے کے لیے برقی آلات کو ان پلگ کریں۔  گیلے ہاتھوں سے برقی آلات کو مت چھوئیں.

این ڈی ایم اے کی ایڈوائزری میں تمام متعلقہ محکموں کو الرٹ رہنے اور حفاظتی اقدامات کی ہدایت جاری کی گئی ہیں۔