ڈھاکہ: بنگلادیش کی وزیر اعظم شیخ حسینہ واجد کے مستعفی ہونے کے بعد آرمی چیف نے عبوری حکومت بنانے کا اعلان کردیا۔

بھارتی میڈیا کے مطابق بنگلادیش میں کشیدگی شدت اختیار کرگئی جس کے بعد بنگلادیش کی وزیراعظم شیخ حسینہ واجد فوجی ہیلی کاپٹر میں بھارت روانہ ہوگئی۔

رپورٹ کے مطابق بنگلادیش کی آرمی نے موجودہ وزیراعظم کو مستعفی ہونے کے لئے 45 منٹ کی ڈیڈ لائن دی تھی تاہم اب حسینہ واجد نے استعفیٰ دے دیا ہے جب کہ ان کے مستعفی ہونے پر مظاہرین نے نوافل ادا کیے اور سڑکوں پر جشن منایا۔

رپورٹ میں دعویٰ کیا گیا ہے کہ شیخ حسینہ واجد نے نامعلوم مقام سے تقریر ریکارڈ کرانے کی بھی کوشش کی تھی، حسینہ واجد اپنی بہن کے ہمراہ بھارتی شہر اگرتلہ روانہ ہوئی ہیں۔

سرکاری رہائش گاہوں پر ہزاروں افراد داخل ہوگئے ہیں، دارالحکومت ڈھاکہ میں بھی وزیر اعظم شیخ حسینہ کی سرکاری رہائش گاہ پر مظاہرین نے دھاوا بول دیا ہے۔ حسینہ واجد کے استعفے کے بعد مظاہرین نے ہر طرف لوٹ مار شروع کردی ہے۔

دوسری جانب بنگلادیش کے آرمی چیف نے مختلف سیاسی شخصیات سے ملاقاتوں کے بعد ملک میں عبوری حکومت بنانے کا اعلان کردیا۔

آرمی چیف جنرل وقار الزمان نے خطاب میں کہا کہ حیسنہ واجد کے استعفیٰ کے بعد بنگلادیش میں عبوری حکومت بنائی جائے گی۔

انہوں نے کہا کہ بنگلادیش کے تمام فیصلے فوج کرے گی اور ملک کو مخلوط حکومت کے ذریعے چلایا جائے گا، عوام کو یقین دلاتا ہوں کہ تمام مطالبات پورے کیے جائیں گے۔

بنگلادیشی آرمی چیف کا مزید کہنا تھا کہ عوام صبر کا مظاہرہ کریں اور ملک کو نقصان نہ پہنچائیں، املاک کو نقصان پہنچانے سے کچھ حاصل نہیں ہوگا، مسائل کا حل مل کر نکالیں گے۔