منعم ظفر نے کہا ہے کہ جماعت اسلامی سنجیدگی کےساتھ عوام کا مقدمہ لڑ رہی ہے، حکومت نےعوام کوریلیف نہیں دیا تواحتجاج کا دائرہ وسیع ہوگا۔

بول نیوز کے پروگرام بس بہت ہو گیا میں گفتگوکرتے ہوئے امیر جماعت اسلامی منعم ظفرنے کہا کہ جماعت اسلامی کا احتجاج حکومت ہٹاؤ تحریک میں بھی تبدیل ہوسکتا ہے، جماعت اسلامی سنجیدگی کےساتھ عوام کا مقدمہ لڑرہی ہے۔

منعم ظفرنے کہا کہ آج سے کراچی میں بھی دھرنے کا آغاز ہو گیا ہے، آئی پی پیز کا مسئلہ آج کا نہیں ہے، کراچی کے لوگ مہنگی بجلی لینے پر مجبور ہیں، کراچی میں 18-18 گھنٹے بجلی نہیں ہوتی۔

امیرجماعت اسلامی کراچی نے کہا کہ بجلی آدھی اوربل پورے لیے جاتے ہیں، لوگوں کے دلوں کی آواز جماعت اسلامی کا دھرنا ہے،  لوگ اب انکریمنٹ نہ لگنے کی دعا کررہے ہیں، تاجردوست ٹیکس تاجردشمن ٹیکس ہے۔

منعم ظفرنے پروگرام میں گفتگو کرتے ہوئے کہا کہ جماعت اسلامی کے مطالبات عوام کے مطالبات ہیں، حکومت کو گھٹنے ٹیکنے پر مجبورکردیں گے، حکومت نےعوام کوریلیف نہیں دیا تواحتجاج کا دائرہ وسیع ہوگا۔

امیرجماعت اسلامی کراچی کا کہنا تھا کہ حکومت کو سمجھ سب کچھ آرہا ہے لیکن کرنا نہیں چاہتی، حکومت اپنے شاہانہ اخراجات ختم نہیں کرنا چاہتی، حکومت کوکیا پریشانی ہے اگر پٹرول کی مراعات ختم کردی جائیں، بجلی نہ بنانے والی آئی پی پیزکے ساتھ معاہدوں کوختم کردیاجائے۔