لاہور: لیگی رہنما طارق فضل چوہدری کا کہنا ہے کہ بنگلا دیش پاکستان نہیں جب کہ بنگلا دیشی اور پاکستانی فوج میں فرق ہے۔

مسلم لیگ ن کے رہنما طارق فضل چوہدری نے میڈیا سے گفتگو کرتے ہوئے کہا کہ قومی اسمبلی میں کشمیر سے متعلق متفقہ قرارداد منظور کی گئی، کشمیریوں کے لیے ہر فورم پر آواز بلند کرتے رہیں گے۔

طارق فضل چوہدری کا کہنا ہے کہ قومی اسمبلی میں الیکشن ایکٹ ترمیمی بل منظور کیا گیا، الیکشن ایکٹ ترمیمی بل کی منظوری آئین کے مطابق ہے۔

ان کا کہنا تھا کہ آزاد امیدوار کو الیکشن جیتنے پر پارٹی جوائن کرنے کے لیے 3 دن ملتے ہیں، آئین کے مطابق قانون واضح کرنے کے لیے ترمیم لائی گئی جب کہ پی ٹی آئی ہر فورم پر کہتی رہی یہ نشستیں سنی اتحاد کو دی جائیں۔

انہوں نے کہا کہ بنگلادیش پاکستان نہیں، بنگلا دیشی اورپاکستانی فوج میں فرق ہے جب کہ افواج پاکستان نے ثابت کیا کہ ملک کی سلامتی پر سمجھوتہ نہیں ہوسکتا، افواج پاکستان کے جوان بے مثال قربانیاں دے رہے ہیں۔

لیگی رہنما کہتے ہیں کہ افواج پاکستان کے شہداء نے ملک کی خاطر قربانیاں دی ہیں، بنگلا دیش کے حالات کے پیچھے مخصوص سوچ اور فسطائیت رہی ہے جب کہ حسینہ واجد نے جمہوریت کے نام پر ڈکٹیٹرشپ جاری رکھی۔

طارق فضل چوہدری کا مزید کہنا تھا کہ حسینہ واجد کے جبر کے نتیجے میں بنگلا دیش کےحالات سامنے ہیں، 2018 کے الیکشن کے بعد پی ٹی آئی نے سیاست کو تقسیم کیا، قوم کو تقسیم کرنے کی بات کوئی بھی سیاسی لیڈر نہیں سوچ سکتا۔