بین الاقوامی ادارہ برائے مہاجرت (آئی او ایم) کا کہنا ہے کہ غذائی قحط سے سوڈان میں ہزاروں افراد کی موت کا خطرہ منڈلا رہا ہے۔

بین الاقوامی ادارہ برائے مہاجرت (آئی او ایم) نے سوڈان میں نقل مکانی کے دنیا کے سب سے بڑے بحران کے جواب میں ممالک پر زور دیا ہے کہ وہ اپنے عطیات میں اضافہ کریں۔

آئی او ایم کے سوڈان مشن کے سربراہ محمد رفعت نے ایک بریفنگ میں بتایا کہ آئی او ایم کو سوڈانیوں کو اہم امداد فراہم کرنے کے لئے درکار امداد کا صرف 21 فیصد ملا ہے، جو پہلے ہی تنازعات کا شکار ہیں اور اب بھوک، بیماری اور سیلاب کا سامنا کر رہے ہیں۔

انہوں نے کہا کہ بین الاقوامی برادری خاطر خواہ اقدامات نہیں کر رہی ہے۔

انہوں نے مزید کہا فوری طور پر بڑے پیمانے پر اور مربوط عالمی ردعمل کے بغیر، ہم آنے والے مہینوں میں ہمیں سوڈان سے ہزاروں افراد کے مرنے کی خبریں ملیں گی۔

آئی او ایم کے مطابق سوڈان میں ہر پانچ میں سے ایک شخص بے گھر ہوا ہے، ایک کروڑ سات لاکھ افراد اندرونی طور پر بے گھر ہوئے ہیں اور 23 لاکھ افراد سرحد پار ہجرت کر چکے ہیں۔

سوڈان میں اپریل 2023 میں شروع ہونے والے تنازعات نے نسلی تشدد کی لہروں کو جنم دیا ہے اور ملک بھر میں قحط جیسے حالات پیدا کردیے ہیں۔