جماعت اسلامی کے امیر حافظ نعیم الرحمن کا کہنا ہے کہ حکومتی مذاکراتی کمیٹی بھاگ ہے ہم انہیں تلاش کر رہے ہیں۔

بول نیوز کے پروگرام ’تجزیہ‘ میں سینئر اینکر پرسن ارباب جہانگیر سے خصوصی گفتگو کرتے ہوئے امیر جماعت اسلامی حافظ نعیم الرحمن نے کہا کہ ہم نے اپنے مطالبات حکومت کی ٹیکنیکل ٹیم کے سامنے رکھ دیے ہیں۔

حکومت کو ہمارے مطالبات درست لگ رہے تھے، حکومت کے لوگ جب میڈیا کے سامنے جاتے ہیں تو دوسری بات کرتے ہیں۔

حافظ نعیم الرحمن کا کہنا تھا کہ کمیٹی بھاگ گئی ہے انہیں تلاش کیا جا رہا ہے، کئی شہروں میں دھرنے کا سلسلہ شروع ہو گیا ہے، اگر ہمارے مطالبات جائز ہیں تو حکومت قبول کرے۔

انہوں نے کہا کہ حکومت کے فیصلوں کا بوجھ عوام کیوں اُٹھائے؟ ہمارے ملک میں معیاری تعلیم نہیں ہے، بجلی کے بل اتنے آ رہے ہیں کہ لوگ ادا نہیں کر سکتے۔

بنگلادیش کی صورتحال کے بعد اب غم وغصہ خاص رُخ کی طرف جا سکتا ہے، ہم انارکی نہیں چاہتے، ہم نہیں چاہتے کہ گولیاں چلیں یا فساد ہو۔

حکومت سمجھ رہی ہے کہ 4،2 چیزیں کر کے دھرنا ختم ہو جائے گا، حکومت کو مسئلہ حل کرنا ہو گا اس کےعلاوہ کوئی آپشن نہیں، جن کوعوام نے مسترد کر دیا ان سے ہمیں کیا خطرہ ہو گا۔

لوگ ڈی چوک کا کہہ رہے ہیں، ڈی میں تو گول ہوتا ہے، گول تو پھر پارلیمنٹ ہاؤس میں ہو گا یا وزیراعظم ہاؤس میں ہوگا، ہم نہیں چاہتے کہ حالات خراب ہوں۔

کمیٹی سے بات کر نہیں سکتے اور مناظرے کی بات کر رہے ہیں، جس جس نے ملک کو لوٹا ہے ان سب کے خلاف کارروائی ہونی چاہیے، حساب سب کو دینا پڑے گا، اگرایمانداری سے کام کرنے کی نیت ہو تو حکومت بہت کچھ کر سکتی ہے۔

آئی ایم ایف کے معاہدے میں لکھا ہے کہ تعلیم پر ٹیکس نہ لگائیں، حکومت نے تو تعلیم پر بھی ٹیکس لگایا ہوا ہے، حکومت دلدل میں ڈالنے کے بعد ہم سے پوچھتی کہ کیسے مسئلہ حل ہو گا۔

حکومت وزراء کی مراعات کم کرے، سرکار کی گاڑیوں میں پٹرول عوام کے پیسوں سے ڈالا جاتا ہے، وزراء 1300 سی سی گاڑی میں کیوں نہیں بیٹھ سکتے؟ وزراء کا پٹرول ختم کر دیں تو ایک ہزار ارب بچا سکتے ہیں، لغاری صاحب 1300 سی سی گاڑی میں بیٹھ کرمناظرہ کر لیں۔

انڈسٹریز بند ہو رہی ہیں، تاجر اس وقت پریشان ہیں، ہم صرف حکومت سے بات کریں گے، اگر حکومت کو کسی سے اجازت لینی ہے تو لے سکتی ہے، نفرت کی سیاست نہیں ہونی چاہیے۔

ہم چاہتے ہیں کہ عوامی مسائل پر سیاست ہو، عوام کا اعتبار جماعت اسلامی پر بڑھتا جا رہا ہے۔

جماعت اسلامی کے امیر حافظ نعیم الرحمان نے مزید کہا کہ حکومت ثابت کر دے کہ ہمارے مطالبات غلط ہیں، اگر ہمارے مطالبات درست ہیں تو حکومت کو بات ماننی پڑے گی۔