اسلام آباد: الیکشن ایکٹ ترمیمی بل 2024 قومی اسمبلی کے بعد سینیٹ نے بھی منظور کرلیا ہے۔

الیکشن ایکٹ ترمیمی بل 2024 کی سینیٹ میں شق وار منظوری دی گئی، سینیٹر طلال چوہدری کی جانب سے بل سینیٹ میں پیش کیا گیا تھا۔

اپوزیشن نے ایوان میں احتجاج کرتے ہوئے بل کی مخالفت کی اور شور شرابہ کیا جب کہ الیکشن ایکٹ ترمیمی بل قومی اسمبلی سے پہلے ہی منظور ہوچکا ہے۔

قومی اسمبلی میں بھی اپوزیشن کے شدید احتجاج اور شور شرابے میں الیکشن ایکٹ ترمیمی بل کثرت رائے سے منظور کیا گیا، قومی اسمبلی میں حکومتی رکن بلال اظہر کیانی نے الیکشن ایکٹ ترمیمی بل پیش کیا تھا۔

اپوزیشن کی جانب سے شدید نعرے بازی کے بعد اسپیکر نے سنی اتحاد کونسل کے رکن علی محمد خان کو ترامیم پیش کرنے کی ہدایت کی تھی۔

اجلاس کے دوران علی محمد خان اور صبغت اللہ نے ترمیم پیش کیں، جس کے بعد وفاقی وزیر پارلیمانی امور اعظم نذیر تارڑ نے سنی اتحاد کونسل کے ارکان کی ترامیم کی مخالفت کردی تھی۔