فخر پاکستان ارشد ندیم آج وزیر اعظم کے خصوصی مہمان کے طور پر اسلام آباد پہنچے۔

ارشد ندیم اور ان کے اہل خانہ کو میاں چنوں سے سرکاری اعزاز کے ساتھ اسلام آباد لایا گیا، ملتان سے خصوصی طیارہ ارشد ندیم کو لے کر اسلام آباد پہنچا۔

ایئرپورٹ پر وزیر اطلاعات عطا تارڑ اور دیگر نے ارشد ندیم اور اہلخانہ کا استقبال کیا، قومی ہیرو ارشد ندیم کو پروٹوکول میں وزیراعظم ہاؤس پہنچایا گیا۔

اولمپک ریکارڈ ہولڈر ارشد ندیم نے وزیر اعظم کی جانب سے دیئے گئے عشائیے میں شرکت کی۔

ارشد ندیم کل وزیراعظم کے ساتھ 14 اگست کی تقریب میں پرچم کشائی کریں گے۔

وزیراعظم شہبازشریف نے ارشد ندیم کو خراج تحسین اور کہا کہ قوم کے مایہ ناز سپوت نے یوم آزادی کی خوشیاں دوبالا کر دی ہیں۔

انہوں نے کہا کہ ارشد ندیم کے ایوارڈ کیلئے صدر مملکت کو خط ارسال کر دیا ہے، قومی ہیرو نے 40 سال بعد پاکستان کو گولڈ میڈل جتوایا ہے۔

اس موقع پر ارشد ندیم نے کہا کہ کامیابی پر اللہ تعالیٰ کا شکر ادا کرتا ہوں، پوری قوم نے عزت دی، میڈیا کا بھی شکریہ ادا کرتا ہوں اس سے میرا حوصلہ بڑھا ہے۔

ارشد ندیم نے عزت افزائی پر وزیر اعظم شہباز شریف کا بھی شکریہ ادا کیا، انہوں نے کہا کہ وطن واپسی پر میرا شاندار اور تاریخی استقبال میرے میڈل سے کہیں زیادہ ہے۔

انہوں نے کہا میڈل جیتنے کے لیے میرے کوچ اور ڈاکٹر سمیت سب نے محنت کی، پیرس اولمپکس کیلئے اپنا زور بچا کر رکھا تھا۔

قومی ہیرو ارشد ندیم نے کہا کہ جب تھرو کی تھی تو سمجھ گیا تھا کہ 90 میٹر سے زیادہ ہو گی، آئندہ آنے والے ہر ایونٹ کیلئے بھرپور تیاری کروں گا۔

اس سے قبل وزیراعلیٰ پنجاب مریم نواز ارشد ندیم کے گھر میاں چنوں پہنچیں، وزیر اعلیٰ پنجاب نے ارشد ندیم کو 10 کروڑ روپے کا چیک دیا۔

وزیر اعلیٰ پنجاب مریم نواز شریف نے ارشد ندیم کو92.97 نمبر پلیٹ والی خصوصی گاڑی کا تحفہ بھی دیا گیا، یہ نمبر ارشد ندیم کے پیرس اولمپکس میں 92.97 میٹر ریکارڈ تھرو کی مناسبت سے الاٹ کیا گیا ہے۔