امیر جماعت اسلامی حافظ نعیم الرحمن کا کہنا ہے کہ دھرنے میں 10 گزار لیے ہیں 100 دن بھی گزار لیں گے۔

مہنگائی اور مہنگی بجلی کے خلاف راولپنڈی میں جاری جماعت اسلامی کے دھرنے کے شرکاء سے خطاب کرتے ہوئے امیر جماعت اسلامی حافظ نعیم الرحمن کا کہنا تھا کہ یہاں نہیں بیٹھے رہیں گے آگے بھی بڑھیں گے۔

انہوں نے کہا کہ گور نرہاؤس پر دھرنے میں گورنر سندھ نے خدمت شروع کردی، آپ نے چائے بھیجی آپ کا شکریہ، ہم اس لیے نہیں آئے ہیں، کامران ٹیسوری 1300 سی سی گاڑی پر آ کر مثال قائم کریں۔

امیر جماعت اسلامی نے کہا کہ ساری مافیا کے الیکٹرک کو سپورٹ کرتی ہے، ہمارا دھرنا 10 ویں روز میں داخل ہو گیا ہے، ہم نے فیصلہ کیا تھا کہ کسی سازش کا حصہ نہیں بنیں گے، ہم تصادم اور ٹکراؤ کا راستہ اختیار نہیں کریں گے۔

حافظ نعیم الرحمن کا کہنا تھا کہ پشاور اور لاہور کیلئے بھی دھرنے کا اعلان ایک سے 2 روز میں کروں گا، یہ تحریک حق کی بالادستی کی تحریک ہے، ہم نے 7 نکاتی ایجنڈا رکھا ہے اس سے پیچھے نہیں ہٹیں گے۔

بجلی بل قبول نہیں، ایسا نہ ہو ہم اپیل کریں بجلی کے بل نہ ادا کریں، حکمرانوں کو ہوش کے ناخن لینے چاہئیے، یہ مذاکرات کرتے ہیں پھرکچھ اور بات کرتے ہیں بعد میں کچھ اور، یہ خاندان ہم پر فیملی انٹرپرائزر کی صورت میں مسلط ہیں۔

وزیراعظم بجلی کے بل کم کریں اسی میں ان کی نجات ہے، یہ نہ ہو آپ کی حکومت ہی چلی جائے، سارا بوجھ تنخواہ دار طبقہ اٹھائے ایسا نہیں چلے گا۔

جس کی بھی حکومت آئی ایم کیوایم اس کاحصہ رہی ہے، ایم کیو ایم ہر حکومت میں اپنا حصہ لیتی رہی ہے، وزیراعظم سے نچلی سطح تک یہ سب جھوٹ بول رہے ہیں۔

آئی پی پیز بچانے کیلئے ہمیں ڈرایا جاتا ہے، یہ امریکہ اور آئی ایم ایف کےغلام ہیں۔

امیر جماعت اسلامی حافظ نعیم الرحمن نے مزید کہا کہ یہ آئی ایم ایف کے نئے پروگرام میں جا رہے ہیں، یہ بجلی اور گیس مزید مہنگی کریں گے۔