بانی پی ٹی کے لیے اڈیالہ جیل میں سہولت کاری میں ملوث ڈپٹی سپرنٹنڈنٹ اڈیالہ جیل محمد اکرم کے ساتھیوں کے گرد بھی گھیرا تنگ کردیا گیا۔

جیل ذرائع کے مطابق اڈیالہ جیل کے مزید ملازمین کی گرفتاری بھی متوقع ہے، ڈپٹی سپرنٹنڈنٹ اڈیالہ جیل محمد اکرم کو بانی پی ٹی آئی کی سہولت کاری کے الزام میں بدھ کے روزحراست میں لیا تھا۔

محمد اکرم کو پہلے ہی ان کے عہدے سے ہٹا کر خفیہ تفتیش کی جارہی تھی، شواہد سامنے آنے پر قانون نافذ کرنے والے اداروں نے حراست میں لیا۔

بانی پی ٹی آئی کو جیل میں فون تک رسائی ان کے پیغامات اور خطوط خفیہ طورپرجیل سے باہر پہنچانے کے الزامات کی تفتیش کے دوران قانون نافذ کرنے والے اداروں نے محمد اکرم کے ساتھ دواردلی تین وارڈنز اور ہیڈ وارڈن کو بھی شامل تفتیش کرلیا۔

ڈپٹی سپرنٹنڈنٹ اڈیالہ جیل محمد اکرم کے ساتھ دو اردلی تین وارڈنزاور ایک ہیڈ وارڈن سے بھی تفتیش کی جارہی ہے جبکہ جیل ذرائع نے اڈیالہ جیل میں مزید افراد کو بھی تفتیش کے دائرے میں لانے کا عندیہ دیا ہے۔

بانی پی ٹی آئی کو جیل میں فون کی سہولت کے دوران تین یورپی ممالک کے نمبرز پر واٹس ایپ پر رابطہ بھی کروایا جاتا رہا ہے، جس کے شواہد تفتیشی افسران کو مل چکے ہیں۔

دوسری جانب بانی پی ٹی آئی کے سیل کی بھی کڑی نگرانی شروع کر دی گئی ہے۔ سیل کے قریب تعینات اہلکاروں کو ہفتہ وار تبدیل کیا جائے گا۔

جیل میں قائم عدالت کی سماعت کے دوران میڈیا نمائندوں سمیت وکلا پارٹی رہنماؤں کو بھی بانی پی ٹی آئی سے دور رہنے کی ہدایات جاری کی گئی ہیں۔

جیل کے اندررہائش پذیراہلکاروں کے رہائش گاہوں کی وقتا فوقتا تلاشی کا عمل بھی جاری رہے گا۔