امیر جماعت اسلامی حافظ نعیم الرحمن کا کہنا ہے کہ فلسطینی شہادت کے رتبے کو صحیح طریقے سے جان گئے ہیں۔

راولپنڈی میں غزہ مارچ کے شرکاء سے خطاب کرتے ہوئے جماعت اسلامی کے امیر حافظ نعیم الرحمن کا کہنا تھا کہ اسماعیل ہنیہ کو شہید کر کے اسرائیلی یہ سمجھ رہے تھے کہ فلسطینیوں کے حوصلے پست ہو گئے ہیں۔

انہوں نے کہا کہ اسماعیل ہنیہ کی شہادت کے بعد فلسطینیوں میں جیسے بجلی بھر گئی ہے، وہ شہادت کے رتبے کو صحیح طریقے سے جان گئے ہیں۔

امیر جماعت اسلامی نے کہا کہ میں فلسطینی رہنماؤں سے ملا کوئی بھی پریشان نظرنہ آیا سب پُرعزم تھے۔

حافظ نعیم الرحمن نے بتایا کہ میں اسماعیل ہنیہ کے بیٹے سے ملا تو ان کو بھی پُرعزم  پایا، اسماعیل ہنیہ کے پوتے کا حوصلہ دیکھ کر ایمان تازہ ہوا۔

ان کا کہنا تھا کہ انشاءاللہ فلسطین آزاد ہو گا، آج بھی فلسطینی قوم ایک انچ بھی پیچھے نہیں ہو رہی ہے، آج بھی جو اسرائیل کو تسلیم کرنے کی بات کرتا ہے وہ صہیونی ایجنٹ ہے۔

غزہ کو اسرائیل نے جیل بنا دیا تھا اگر حماس یہ کام نہ کرتی تو کون کرتا۔

امیر جماعت اسلامی حافظ نعیم الرحمن کا مزید کہنا تھا کہ القسام بریگیڈ نے دنیا کا سب سے بڑا جاسوسی آپریشن کیا، حماس نے اسرائیل اور امریکہ کی جدید ٹیکنالوجی کو مات دی۔