وفاقی وزیر توانائی سردار اویس لغاری نے کہا ہے کہ کے الیکٹرک کو جنریشن دینا غلطی تھی۔

بول نیوز کے پروگرام ’تبدیلی‘ میں سینئر اینکر اور تجزیہ نگار ڈاکٹر دانش کے ساتھ گفتگو میں وفاقی وزیر توانائی اویس لغاری کا کہنا تھا کہ پاور سیکٹر میں 18 مختلف مسائل ہیں۔

وفاقی وزیر نے کہا کہ نیشنل ٹرانسمیشن میں مسائل ہیں، ترسیل میں 70 سے 100 ارب سالانہ کا نقصان ہے، بجلی کی قیمت کم کرنے کے لئے کوشاں ہیں۔

انہوں نے کہا کہ چین نے ہمارے بجلی کے مسائل کم کئے، آئی پی پیز سے بات چیت سے معاملات حل ہونگے، بجلی کی طلب میں کمی بیشی ہوتی رہتی ہے۔

سردار اویس لغاری کا کہنا تھا آئی پی پیز سے بات چیت سے معاملات حل ہونگے، بجلی کی طلب میں کمی بیشی ہوتی رہتی ہے، صنعتی لوڈ سے بجلی کی ڈیمانڈ مستقل ہو سکتی ہے۔

ایک سوال کے جواب میں اویس لغاری نے کہا کہ مقامی کوئلے سے بجلی کی لاگت 8 روپے یونٹ ہوسکتی ہے، چین ہماری ہر طرح سے مدد کے لئے تیار ہے، تھرکول کی تیز ترسیل کے لئے کوشاں ہیں۔

انہوں نے کہا کہ سولر سے ایک ہزار یونٹ بجلی پیدا ہوتی ہے، پن بجلی کے منصوبے زیر تکمیل ہیں۔

وفاقی وزیر کا کہنا تھا کہ اصل مسئلہ کیپسٹی پیمنٹ کا ہے، آئی پی پیز سے معاملات سلجھانا ہمارا ایجنڈا ہے، چین کے ساتھ معاملات کسی صورت خراب نہیں کر سکتے۔

ان کا کہنا تھا کہ بجلی کی چوری پر قابو پایا ہے، مزید کام کرنا ہے، اگلے 2 سال میں 11 میں سے 9 کمپنیز کی نجکاری ہو گی۔

وفاقی وزیر توانائی سردار اویس لغاری کا مزید کہنا تھا کہ ڈھائی کروڑ صارفین 18 فیصد سیلز ٹیکس دے رہے ہیں، کے الیکٹرک کو جنریشن دیناغلطی تھی۔