احسن اقبال نے کہا ہے کہ آئین بنانا، تبدیل کرنا پارلیمنٹ کا استحقاق ہے۔ بانی پی ٹی آئی کی حکومت کوبچانے کے لیے سپریم کورٹ نے آئین کو تبدیل کیا۔ 

اسلام آباد میں وفاقی وزیر برائے منصوبہ بندی احسن اقبال نے نیوز کانفرنس کرتے ہوئے کہا ہے کہ حکومت کے اقدامات سے معاشی صورت حال میں نمایاں کمی آئی ہے۔ ملک میں بیرونی سرمایہ کاری آ رہی ہے۔

احسن اقبال نے کہا کہ مہنگائی کی شرح کم ہو گئی، معیشت میں استحکام آ رہا ہے۔ پی ڈی ایم حکومت نے مشکل فیصلے کرکے ملک کو دیوالیہ ہونے سے بچایا۔

انھوں نے کہا کہ پاکستان سی پیک منصوبوں کی وجہ سے توجہ کا مرکز بند گیا ہے۔ اسٹاک مارکیٹ پہلی بار80 ہزار پوائنٹس تک پہنچ گئی۔

احسن اقبال نے کہا کہ پی ٹی آئی دورمیں سرمایہ کاروں کی حوصلہ شکنی کی گئی، 2018 سے 2022 کے دوران پاکستان کی معیشت کا بد ترین دور رہا ہے، سی پیک منصوبوں کو سبوتاژکیا گیا۔

وفاقی وزیربرائے منصوبہ بندی نے کہا کہ پی ٹی آئی کے چارسالہ دورمیں انتقام اور جھوٹ کی سیاست کی گئی۔ فرضی کہانی اورسوشل میڈیا کا سہارا لے کرحکمرانی کی گئی۔

احسن اقبال نے کہا کہ آئی ایم ایف کا پروگرام سبوتاژکرنے کے لیے بانی پی ٹی آئی نے اوچھے ہتھکنڈے استعمال کے۔ سی پیک پالیسز پریوٹرن لیا گیا، سارے سرمایہ کار واپس چلے گئے۔

انھوں نے مزید کہا کہ بانی پی ٹی آئی نے ملک میں انتشارپیدا کیا۔ حمزہ شہبازکی حکومت کو پلٹانے کے لیے غلط تشریح کی گئی۔ آئین بنانا، تبدیل کرنا پارلیمنٹ کا استحقاق ہے۔ بانی پی ٹی آئی نے اداروں کو سیاست کی نذرکیا۔

ان کا کہنا تھا کہ ہم بہت اہم دوراہے پرہیں۔ قانون کی پاسداری سے معاشرے میں امن ہوگا۔ بانی پی ٹی آئی کی حکومت کوبچانے کے لیے سپریم کورٹ نے آئین کو تبدیل کیا۔