پاکستان میں تعینات چینی سفیر جیانگ ژی ڈونگ نے میڈیا کے نمائندوں سے بات کرتے ہوئے کہا کہ پاکستان میں ایس سی او کا انعقاد کامیاب رہا۔

چینی سفیر نے کہا کہ 4 ماہ کے اندر پاک چین رہنماؤں کی دوبارہ ملاقات قریبی تعلق کا اظہار ہے، چینی وزیراعظم کے دورے کے دوران متعدد اہم ایم اویوز پر دستخط ہوئے۔

انہوں نے کہا کہ چینی وزیراعظم نے ہم منصب کے ہمراہ گوادر کے جدید ایئرپورٹ کا افتتاح کیا، چینی وزیراعظم نے صدر، وزیراعظم، اسپیکر اور چیئرمین سینیٹ سے ملاقاتیں کیں۔

سفیر جیانگ ژی ڈونگ نے کہا کہ چینی وزیراعظم نے آرمی چیف و دیگرعہدیداروں سے بھی ملاقاتیں کیں، چینی وزیراعظم نے ملاقاتوں میں چینی شہریوں کے تحفظ کی بات کی۔

ان کا کہنا تھا کہ چین چاہتا ہے چینی شہریوں پر حملوں میں ملوث افراد کیفر کردار تک پہنچیں، پاکستان میں دہشت گردی کا شکار چینی شہری معصوم ہیں۔

چینی شہری پاکستان کی ترقی کے لیے منصوبوں پر کام کر رہے ہیں، پاکستان میں زندگی کے تمام مکاتب فکر نے ان حملوں کی مذمت کی۔

ان کا کہنا تھا کہ چینی رہنماؤں نے عزم کیا کہ وہ دہشت گردی کو جڑ سے اکھاڑیں گے، رہنماؤں نے کہا کہ چینی شہریوں پر حملوں کی بھرپور تحقیقات کریں گے۔

چینی سفیر جیانگ ژی ڈونگ نے مزید کہا کہ پاکستانی فوج اور پولیس کو خراج تحسین پیش کرتے ہیں۔