سینیٹرطلال چوہدری کا کہنا ہے کہ نومئی والوں سے کوئی ڈیل نہیں ہوگی، کے پی کے سرکاری وسائل کو وفاق پرحملے کیلئے استعمال کیا گیا۔

فیصل آباد میں میڈیا سے گفتگو کرتے ہوئے سینیٹر طلال چوہدری نے کہا کہ پی ٹی آئی تبدیلی کے نام پرمنتخب ہوئی تھی، کے پی کے لوگ صحت کے مسائل کے باعث دوسرے صوبوں میں علاج کرانے پرمجبور ہیں، کے پی کے لوگ دہشت گردی کا شکار ہیں۔

طلال چوہدری نے کہا کہ کہتے تھے سب سے پہلے سینے پر گولی کھاؤں گا لیکن پیٹھ دکھا کر بھاگ گئے۔ سرکاری وسائل اسلام آباد پر چڑھائی کے لیے استعمال ہوئے۔ فورسز کی یادگاروں کو روندا گیا، آپ نے بغاوت کی کوشش کی اوراس میں بھی ناکام ہوئے۔

سینیٹرطلال چوہدری نے کہا کہ کے پی کے سرکاری وسائل کو وفاق پرحملے کیلئے استعمال کیا گیا، جب کوئی ریڈ لائن کراس کرے گا تو حکومت کے پاس آپشن موجود ہیں۔ الیکشن آپ کی مرضی سے نہیں آئین کے مطابق ہوئے۔ کہتے تھے 26 ویں آئینی ترمیم ہماری ریڈ لائن ہے وہ بھی پاس ہو گئی۔

پاکستان میں سیاسی استحکام بہت مشکل سے حاصل کیا گیا، آپ لوگوں کوکیا میسج دینا چاہتے ہیں؟ آپ لوگوں کو کہتے کچھ ہیں اورکرتے کچھ ہیں۔  پی ٹی آئی میں ایک گروپ کچھ کہتا ہےاوردوسرا کچھ کہتا ہے۔ ڈیل کی افواہیں، ٹرمپ کا نام یہ لوگ اپنی شکست تسلیم کررہے ہیں اورفیس سیونگ چاہتے ہیں۔ آپ کے کرتوتوں اورنومئی والوں سے کوئی ڈیل نہیں ہوگی۔

سینیئررہنما مسلم لیگ ن نے کہا کہ پاکستان کی معیشت بہترہورہی ہے، آپ کوتکلیف اسٹاک کی بہتری کی ہے یا مہنگائی میں کمی کی؟ وہ جو 190 ملین پاؤنڈ ہیں آپ کی جیبوں سے نکالے جائیں گے۔

سینیٹرطلال چوہدری نے کہا کہ بہن کچھ تواہلیہ کچھ کہتی ہیں، بیوی کہتی ہے میرا قبضہ ہے، بہن اپنا قبضہ کرناچاہتی ہیں، کبھی کہتے ہیں ڈیل ہوگئی توکبھی ڈھیل مل گئی، امریکہ جس نے حکومت گرائی تھی اب کہتے ہیں وہ بچائےگا۔