سندھ ہائیکورٹ نے ٹیلیفون کوآپریٹو ہاؤسنگ سوسائٹی میں نجی فرد کی بطور ایڈمنسٹریٹر تعیناتی کا نوٹفکیشن معطل کردیا۔ 

تفصیلات کے مطابق سندھ ہائیکورٹ میں ٹیلیفون کوآپریٹو ہاؤسنگ سوسائٹی میں نجی فرد کی بطور ایڈمنسٹریٹر تعیناتی کے معاملے پرعدالت نے ایڈمنسٹریٹرکی تعیناتی کا نوٹیفکیشن معطل کردیا۔

عدالت نے سوسائٹیزمیں نجی افراد کی بطور ایڈمنسٹریٹر تعیناتی سے روک دیا۔ عدالت کے حکم پرایڈمنسٹریٹرسوسائٹی شاہنواز لاشاری پیش ہوئے، جسٹس ظفر راجپوت نے ان سے استفسار کیا کہ آپ کی کیا تعلیم ہے؟

شاہنوازلاشاری نے جواب دیا کہ اسکول سے انٹرسائنس تک تعلیم حاصل کی ہے، اس پرعدالت نے پوچھا کہ انٹرمیں کون کون سے مضامین پڑھے تھے، میں یہ بھول چکا ہوں، مجھے یاد نہیں ہے۔

عدالت نے پوچھا کہ یہ جو آپ کے ہاتھ میں ایڈمنسٹریٹرکی حیثیت سے تعیناتی کا نوٹیفکیشن ہے اسے پڑھ سکتے ہیں؟ جس پرشاہنواز لاشاری نے جواب دیا کہ اس وقت نہیں پڑھ سکتا، میرا چشمہ گم ہوگیا ہے۔

عدالت نے ناظر ہائیکورٹ کو سوسائٹی کے ایڈمنسٹریٹرکی حیثیت سے چارج لینے کی ہدایت کردی۔

ذیشان عبداللہ ایڈووکیٹ نے کہا کہ اس سے پہلے بھی غیر قانونی طورپرمختلف ایڈمنسٹریٹر تعینات کیے گئے، ان لوگوں نے بدعنوانی کی اور ریکارڈ بھی اپنے ساتھ لے گئے۔

عدالت نے ہدایت کی کہ رجسٹرارکوآپریٹو سوسائٹیز ریکارڈ کی 15 دن میں واپسی یقینی بنائیں، ناظرریکارڈ کا معائنہ کرکے بے قاعدگیوں کی رپورٹ مرتب کریں، اگر رفاہی پلاٹس کی الاٹمنٹ یاکسی پلاٹ کی ڈبل فائنل پائی جائے تو براہ راست ایف آئی آر درج کرائی جائے۔

سندھ ہائیکورٹ نے ناظرکو سوسائٹی کے اخراجات سے گارڈزکی تعیناتی کا عمل شروع کرنے کی ہدایت کردی۔