وزیراعظم شہباز شریف نے 7 ویں نیشنل میری ٹائم سیکیورٹی ورکشاپ کے اختتامی سیشن سے خطاب کرتے ہوئے کہا کہ پاکستان دہشت گردی کی وجہ سے بھاری قیمت ادا کر رہا ہے۔

وزیر اعظم نے کہا کہ ہمارے افسران اور جوان اپنے عوام کے مستقبل کے لیے اپنی جانوں کا نذرانہ دے رہے ہیں۔

ان کا کہنا تھا کہ پاک بحریہ سمندری حدود کا تحفظ یقینی بنا رہی ہے اور چیلنجز سے نبرد آزما ہونے کی مکمل صلاحیت رکھتی ہے۔

وزیراعظم نے بلیو اکانومی کی اہمیت پر زور دیتے ہوئے کہا کہ یہ ہمارے معاشی مستقبل کے لیے مرکزی حیثیت رکھتی ہے اور پاک بحریہ سمندری وسائل سے استفادے کے لیے مختلف اقدامات کر رہی ہے۔

وزیراعظم نے مزید کہا کہ چین بھی بحری شعبے میں تعاون فراہم کرنے کے لیے تیار ہے، اور بلیو اکانومی سے ہی پاکستان کی ترقی اور خوشحالی ممکن ہے۔

انہوں نے گوادر کی بندرگاہ کو پاکستان کی اقتصادی ترقی میں کلیدی حیثیت کا حامل قرار دیا۔

وزیراعظم نے دہشت گردی کے خاتمے کے حوالے سے اپنے عزم کا اعادہ کیا اور کہا کہ پاکستان حکومت اور افواج دہشت گردی کے خاتمے کے لیے پرعزم ہیں، جیسے کہ 2018 میں دہشت گردی کا مکمل خاتمہ کیا گیا تھا، تاہم بدقسمتی سے دہشت گردی نے دوبارہ سر اٹھایا ہے۔

وزیراعظم نے دہشت گردی کے خلاف جنگ میں 80 ہزار افراد کی شہادت اور معیشت کو 13 ارب ڈالر کے نقصان کا ذکر کیا اور کہا کہ جب تک دہشت گردی کا خاتمہ نہیں کر لیا جاتا، چین سے نہیں بیٹھیں گے۔

انہوں نے اس بات پر بھی زور دیا کہ پاکستان شپنگ کارپوریشن اور کراچی پورٹ ٹرسٹ کے امور کا جائزہ لے کر انہیں بہتر بنانا ضروری ہے، اور کراچی پورٹ ٹرسٹ کا کام ریئل اسٹیٹ کی بجائے کاروبار کے لیے سہولت فراہم کرنا ہے۔

وزیراعظم شہباز شریف نے پاکستان کے قدرتی وسائل اور بے پناہ ٹیلنٹ کو سراہا اور کہا کہ باوجود اس کے کہ ہم وسائل سے مالا مال ہیں، ہمیں قرضوں میں جکڑا گیا ہے۔

سعودی عرب نے پاکستان کو تین ارب ڈالرز کی قرض کی ادائیگی میں توسیع فراہم کی ہے، جسے حکومت کے لیے ایک بڑی سہولت قرار دیا۔

وزیراعظم نے کہا کہ ہمیں اپنی حقیقی ترجیحات پر توجہ دینی ہوگی اور ماضی کی غلطیوں سے سبق سیکھ کر آگے بڑھنا ہوگا۔

وزیراعظم نے مزید کہا کہ ہمیں اپنی کوششوں کو یکجا کر کے مضبوط ارادے کے ساتھ اقدامات اٹھانے ہوں گے تاکہ پاکستان کی ترقی اور خوشحالی کو یقینی بنایا جا سکے۔