ملتان میں ہونے والے ورلڈ بلائنڈ کرکٹ کونسل کے 26 ویں اجلاس میں بھارت سے ویمنز بلائنڈ ورلڈ کپ کی میزبانی واپس لے لی گئی۔

اجلاس میں فیصلہ کیا گیا کہ جب تک پاکستان اور بھارت کے درمیان سیاسی کشیدگی برقرار ہے، دونوں ممالک اپنی سرزمین پر کوئی بھی انٹرنیشنل ایونٹ نہیں کھیلیں گے۔

تاکہ کسی بھی قسم کے مسائل سے بچا جا سکے اور دونوں ممالک اپنے ایونٹس نیوٹرل وینیو پر کرائیں گے۔

اجلاس میں بھارت کے بلائنڈ ٹی 20 کرکٹ ورلڈ کپ میں شرکت نہ کرنے پر بھی گرما گرم بحث ہوئی۔

بھارت نے اپنی ٹیم کو پاکستان بھیجنے کے لیے این او سی دینے سے انکار کر دیا تھا، جس کے نتیجے میں پاکستان میں جاری بلائنڈ ٹی 20 کرکٹ ورلڈ کپ متاثر ہو رہا ہے۔

پاکستان نے اس بات کا بھی تذکرہ کیا کہ 2022 میں بھارت نے پاکستان کی بلائنڈ کرکٹ ٹیم کو ویزا دینے سے انکار کیا تھا، جس کی وجہ سے پاکستان کی ٹیم بھارت جانے سے محروم ہو گئی تھی۔

ورلڈ بلائنڈ کرکٹ کونسل کے اجلاس میں پاکستان کے موقف کے بعد بھارت سے ویمنز بلائنڈ ورلڈ کپ کی میزبانی واپس لے لی گئی، جو اگلے سال بھارت میں شیڈول تھا۔

اس کے علاوہ، اجلاس میں پاکستان کے سید سلطان شاہ کو اگلے تین سال کے لیے ورلڈ بلائنڈ کرکٹ کونسل کا صدر برقرار رکھنے کا بھی فیصلہ کیا گیا۔