یوٹیلیٹی اسٹورز کارپوریشن کی جانب سے ایک ہزار سے زائد سٹورز کی بندش پر آل پاکستان ورکرز الائنس نے شدید تحفظات کا اظہار کیا ہے۔

یونینز کا کہنا ہے کہ اسٹورز کی بندش کے فیصلے کے بارے میں انہیں اعتماد میں نہیں لیا گیا، حالانکہ رانا تنویر نے اس بات کی یقین دہانی کرائی تھی کہ یوٹیلیٹی اسٹورز بند نہیں ہوں گے۔

ورکرز الائنس نے اپنے اعلامیے میں کہا کہ حکومت نے وعدہ کیا تھا کہ کسی بھی ملازم کو نوکری سے فارغ نہیں کیا جائے گا اور یوٹیلیٹی اسٹورز کی سبسڈی کی رقم بھی جلد ریلیز کی جائے گی۔

مزید برآں، یہ بھی کہا گیا تھا کہ اسٹورز کی ری اسٹرکچرنگ یونینز کی مشاورت سے کی جائے گی۔

ورکرز الائنس کا مطالبہ ہے کہ یوٹیلیٹی اسٹورز کارپوریشن کے بقایاجات کی فوری ادائیگی کی جائے اور ایک ہزار سے زائد بند سٹورز کو دوبارہ کھولنے کے احکامات جاری کیے جائیں۔

اعلامیے میں یہ بھی کہا گیا ہے کہ جان بوجھ کر ایک منافع بخش ادارے کو خسارے کی طرف دھکیل دیا گیا ہے، جو کہ نہ صرف ملازمین کے لیے بلکہ عوام کے لیے بھی نقصان دہ ہے۔

یونینز نے اس فیصلے کے خلاف جلد لائحہ عمل کا اعلان کرنے کا عندیہ دیا ہے، اور مطالبہ کیا ہے کہ حکومت اپنے وعدوں کی تکمیل کرے تاکہ ورکرز کی فلاح اور ادارے کی کارکردگی پر منفی اثرات کو روکا جا سکے۔