فیفا کے صدر جیانی انفینٹینو نے آج فیفا کی غیرمعمولی جنرل اسمبلی اجلاس میں سعودی عرب کو 2034 کے فٹبال ورلڈ کپ کی میزبانی دینے کا باضابطہ اعلان کیا۔

سعودی عرب نے اس میزبانی کے لیے واحد امیدوار کے طور پر درخواست دی تھی، جسے عالمی سطح پر پذیرائی ملی۔ اس سے قبل، ورلڈ کپ 2030 کی میزبانی اسپین، پرتگال اور مراکش مشترکہ طور پر کریں گے۔

فیفا کے صدر جیانی انفینٹینو نے اس موقع پر کہا، دنیا تنازعات اور جنگوں سے گزر رہی ہے لیکن صرف فٹبال ہی لوگوں کو اکٹھا کرسکتی ہے۔

انہوں نے اس یقین کا اظہار کیا کہ 2034 کا ورلڈ کپ شاندار ہوگا اور اس میں تمام فیڈریشنز کا اتفاق رائے خوش آئند ہے۔

سعودی عرب اس اعلان کا بے صبری سے منتظر تھا اور اب وہ مشرق وسطیٰ کا دوسرا ملک بنے گا جو 2022 کے قطر ورلڈ کپ کے بعد اس عالمی ایونٹ کی میزبانی کرے گا۔

سعودی عرب کے دارالحکومت ریاض میں درعیہ اور بلیو ارڈ سٹی میں بڑی سکرینوں کے ذریعے اس تاریخی لمحے کا استقبال کیا، جہاں ہزاروں افراد اس اعلان کا انتظار کر رہے تھے۔

ورلڈ کپ 2034 کی میزبانی سعودی عرب کے لیے ایک سنگ میل ہے اور اس سے ملک میں فٹبال کی ترقی کے نئے دروازے کھلیں گے۔

فیفا ورلڈ کپ دنیا کا سب سے بڑا سپورٹس ایونٹ ہے، جسے ہر چار سال بعد لاکھوں مداحوں کے سامنے پیش کیا جاتا ہے۔