وزیراعظم کا آذربائیجان کے صدر سے ٹیلی فون پر رابطہ، طیارہ حادثے پر تعزیت کا اظہار

ویب ڈیسک

26th Dec, 2024. 10:58 pm
شيئر
- Font size
  - Small
  - Medium
  - Large
- Dark Mode
- Save
- Print

آرٹیکلز

وزیراعظم کا آذربائیجان کے صدر سے ٹیلی فون پر رابطہ، طیارہ حادثے پر تعزیت کا اظہار
پاکستان غزہ جنگ بندی معاہدے پر عمل درآمد کیلئے واضح موقف پیش کرے گا، دفترخارجہ
مشرف علی زیدی عالمی میڈیا کےلئے ترجمان وزیراعظم مقرر، عطا اللہ تارڑ کی تصدیق ، نو ٹیفکیشن جاری
پنجاب اسمبلی کا 34 واں اجلاس کل شروع ہوگا، اہم بلز اور حکومتی امور پر بحث متوقع

Now Reading:

وزیراعظم کا آذربائیجان کے صدر سے ٹیلی فون پر رابطہ، طیارہ حادثے پر تعزیت کا اظہار

وزیراعظم محمد شہباز شریف نے آذربائیجان کے صدر عزت مآب الہام علیوف سے ٹیلی فون پر بات کی اور گزشتہ روز طیارے کے المناک حادثے میں قیمتی جانوں کے ضیاع پر دلی تعزیت اور یکجہتی کا اظہار کیا۔

وزیراعظم نے اس موقع پر کہا کہ پوری پاکستانی قوم آذربائیجان کے برادر عوام کے دکھ میں برابر کی شریک ہے اور سوگوار خاندانوں کے لیے دعائے مغفرت اور زخمیوں کی جلد صحت یابی کے لیے اللہ تعالیٰ سے دعا گو ہے۔

انہوں نے مزید کہا کہ آذربائیجان کے عوام صبر و استقامت کے ساتھ اس سانحے کا سامنا کریں گے۔

دونوں ممالک کے درمیان دوطرفہ تعلقات کا ذکر کرتے ہوئے وزیراعظم نے صدر علیوف کو یقین دلایا کہ پاکستان اس مشکل وقت میں آذربائیجان کو درکار ہر تعاون فراہم کرنے کے لیے تیار ہے۔

صدر علیوف نے وزیراعظم کی جانب سے اظہار حمایت اور یکجہتی پر شکریہ ادا کیا اور کہا کہ وزیراعظم کا اس موقع پر آذربائیجان کے ساتھ کھڑا ہونا دونوں ممالک کے درمیان دوستی کے پائیدار رشتہ کی عکاسی کرتا ہے۔

دونوں رہنماؤں نے پاکستان اور آذربائیجان کے درمیان دوستی کے تعلقات کو مزید مستحکم کرنے کے عزم کا اعادہ کیا۔

قبل ازیں، وزیراعظم نے اسلام آباد میں آذربائیجان کے سفارتخانے کا دورہ بھی کیا اور گزشتہ روز کے طیارے کے حادثے کے حوالے سے تعزیتی کتاب میں اپنے تاثرات قلمبند کیے۔