نوتعمیرشدہ قذافی اسٹیڈیم کی افتتاحی تقریب میں شاندار آتشبازی کا مظاہرہ کیا گیا، جس نے شائقین کرکٹ کو محظوظ کیا۔

معروف گلوکار عارف لوہار، آئمہ بیگ اور علی ظفر نے اپنی پرفارمنس سے اسٹیڈیم میں موجود تماشائیوں کے جوش و جذبے کو مزید بڑھا دیا۔

اسٹیڈیم کی تزئین و آرائش کے دوران جدید ایل ای ڈی لائٹس اور دو نئی بڑی اسکرینیں نصب کی گئیں، جبکہ انکلوژر کے سامنے تمام جنگلے ختم کر دیے گئے ہیں اور آرام دہ نشستیں لگائی گئی ہیں تاکہ شائقین کرکٹ اور کھلاڑیوں کو عالمی معیار کی سہولتیں فراہم کی جا سکیں۔

افتتاحی تقریب میں قومی کرکٹ ٹیم کی نئی جرسی کی رونمائی بھی کی گئی۔ قومی ٹیم کے کھلاڑیوں نے نئی جرسی کے ساتھ اسٹیڈیم میں قدم رکھا۔ محمد رضوان نے اس موقع پر کہا، “ہوم گراؤنڈ پر اپنے کراؤڈ کے سامنے کھیلنا ہمیشہ ایک الگ جذبہ ہوتا ہے، اور قذافی اسٹیڈیم کی تعمیر نو دیکھ کر بہت خوشی ہوئی ہے۔”

 بابر اعظم نے اسٹیڈیم کی تزئین و آرائش پر خوشی کا اظہار کرتے ہوئے کہا، “شائقین کرکٹ کو قذافی اسٹیڈیم کی تعمیر نو کی مبارکباد دیتا ہوں، اور قوم سے درخواست ہے کہ وہ چیمپئنز ٹرافی کے لیے دعا کرے اور ہمیں سپورٹ کرے۔”

شاہین شاہ آفریدی نے کہا، “انشاءاللہ چیمپئنز ٹرافی پاکستان کی ہوگی، قوم دعاکرے، ہم بہترین کھیل پیش کریں گے۔”

قبل ازیں وزیراعظم شہباز شریف نے نوتعمیرشدہ قذافی اسٹیڈیم کا افتتاح کیا، اور وفاقی وزرا، وزیراعلیٰ پنجاب اور ارکان اسمبلی بھی اس تقریب میں شریک ہوئے۔ اسٹیڈیم کو 117 دنوں کی ریکارڈ مدت میں جدید ترین سہولتوں کے ساتھ تیار کیا گیا ہے، جو پاکستان کرکٹ کے لیے ایک نیا سنگ میل ہے۔