28 مئی 1998ء کا دن پاکستانی تاریخ میں ایک سنگ میل کی حیثیت رکھتا ہے، جب پاکستان نے بلوچستان کے ضلع چاغی میں پانچ کامیاب ایٹمی دھماکے کر کے دنیا کی ساتویں اور مسلم دنیا کی پہلی جوہری طاقت بننے کا اعزاز حاصل کیا۔

اس تاریخی دن کو “یومِ تکبیر” کے نام سے یاد کیا جاتا ہے، جو نہ صرف پاکستان کی دفاعی خودمختاری کی علامت ہے بلکہ اس خطے میں طاقت کے بگڑتے ہوئے توازن کا فیصلہ کن جواب بھی تھا۔

یہ دھماکے بھارت کے مئی 1998ء میں کیے گئے ایٹمی تجربات کے اسٹریٹجک ردعمل کے طور پر کیے گئے۔ پاکستان اٹامک انرجی کمیشن (PAEC) کے مطابق ان تجربات سے ریکٹر اسکیل پر 5.0 شدت کے زلزلے کے جھٹکے ریکارڈ کیے گئے، جن کی مجموعی پیداوار تقریباً 40 کلوٹن تھی۔

دو روز بعد 30 مئی کو پاکستان نے ایک اور کامیاب تجربہ کیا، جس کی پیداوار 12 کلوٹن تھی۔

واضح رہے کہ 1974ء میں بھارت نے راجستھان میں “سمائلنگ بدھا” نامی ایٹمی تجربہ کر کے خطے میں ایٹمی اسلحہ کی دوڑ کا آغاز کیا۔ اس کے جواب میں پاکستان نے جوہری عدم پھیلاؤ کے معاہدے (NPT) پر دستخط کرنے سے انکار کر دیا، کیونکہ قومی سلامتی کے تقاضے کچھ اور تھے۔

اُس وقت کے وزیرِاعظم ذوالفقار علی بھٹو نے پاکستان کو ایٹمی طاقت بنانے کا عزم ظاہر کیا، جو بعد ازاں ایک ریاستی نصب العین بن گیا۔

پاکستان کا جوہری پروگرام خفیہ ترین منصوبہ تھا، جسے دنیا کی نظروں سے اوجھل رکھنا ایک مشکل ترین چیلنج تھا۔

حساس آلات کی خریداری اور پاکستان منتقلی کے لیے انٹیلی جنس ایجنسی آئی ایس آئی نے یورپ، مشرق وسطیٰ، سنگاپور اور دیگر خطوں میں ایک خفیہ نیٹ ورک قائم کیا۔

جرمنی سے ٹریشئم ٹیکنالوجی، سپیکٹرو میٹر اور دیگر ضروری آلات حاصل کیے گئے، جنہیں سنگاپور کے راستے پاکستان منتقل کیا گیا۔

یہ مشن اتنا حساس تھا کہ نیوکلیئر آلات سے بھرے جہازوں کو بھارت کے ائیرپورٹس پر ایندھن کے لیے اترنا پڑا، جہاں آئی ایس آئی کے تربیت یافتہ اہلکار تعینات کیے گئے تاکہ بھارتی انٹیلی جنس کی نظروں سے مشن کو مکمل طور پر محفوظ رکھا جا سکے۔

بھارت کی بے خبری میں پاکستان اپنے دشمن کی زمین پر سے ایٹمی سامان کامیابی سے منتقل کر چکا تھا۔

یومِ تکبیر اس بات کا واضح پیغام ہے کہ پاکستان اپنی آزادی، خودمختاری اور دفاع کے لیے کسی بھی حد تک جا سکتا ہے۔ یہ صرف ایک دفاعی کارنامہ نہیں، بلکہ قومی غیرت، سائنسی صلاحیت، انٹیلیجنس مہارت اور سیاسی بصیرت کا امتزاج ہے۔

یہ دن پاکستان کی دفاعی خودکفالت کی سنہری علامت بن کر ہمیشہ کے لیے تاریخ میں محفوظ ہو چکا ہے۔