بنگلا دیش میں اپوزیشن جماعت بنگلہ دیش نیشنلسٹ پارٹی (BNP) نے فوری انتخابات کا مطالبہ کرتے ہوئے ملک بھر میں احتجاجی مظاہروں کا سلسلہ شروع کر دیا ہے۔

BNP کی سربراہ اور سابق وزیراعظم بیگم خالدہ ضیاء نے لندن سے ویڈیو لنک کے ذریعے پارٹی کارکنوں اور رہنماؤں سے خطاب کرتے ہوئے کہا کہ عبوری حکومت کو صرف بنیادی اصلاحات تک محدود رہنا چاہیے تاکہ رواں سال دسمبر میں شفاف اور منصفانہ انتخابات کرائے جا سکیں۔

انہوں نے عوامی تحریک کی کامیابی کو سراہتے ہوئے کہا کہ فاشسٹ حکومت کو طلبہ اور عوامی احتجاج کے نتیجے میں اقتدار چھوڑنا پڑا۔

مزید پڑھیں: بنگلہ دیشی باشندوں کی بھارت سے جبری بے دخلی شروع،ڈھاکاکی تصدیق

ڈاکٹر محمد یونس کی قیادت میں قائم عبوری حکومت نے ملک میں اصلاحات کا عمل شروع کر رکھا ہے، جس میں انتخابی کمیشن، عدلیہ، سول انتظامیہ، سکیورٹی فورسز اور میڈیا میں تبدیلیاں شامل ہیں۔

ڈاکٹر یونس نے حالیہ بیانات میں کہا ہے کہ انتخابات 2026 کے وسط تک منعقد ہو سکتے ہیں، تاہم اس کا حتمی فیصلہ تمام سیاسی جماعتوں کی مشاورت سے کیا جائے گا۔

گزشتہ سال اگست میں طلبہ تحریک کے نتیجے میں وزیر اعظم شیخ حسینہ واجد کی حکومت کا خاتمہ ہوا اور وہ بھارت فرار ہو گئیں۔ اس کے بعد بنگلہ دیش میں عبوری حکومت قائم کی گئی، جس کی قیادت ڈاکٹر محمد یونس کر رہے ہیں۔

ڈاکٹر محمد یونس نے حکومت میں آتے ہی سیاسی اصلاحات پر کام شروع کر دیا اور تمام سیاسی قیدیوں کو رہا کرنے کا اعلان کیا۔

BNP کی جانب سے احتجاجی مظاہروں کا سلسلہ جاری ہے، جس میں ہزاروں افراد شریک ہیں۔ مظاہرین کا کہنا ہے کہ فوری انتخابات ہی ملک میں جمہوریت کی بحالی کا واحد راستہ ہیں۔

سیاسی تجزیہ کاروں کے مطابق، BNP آئندہ انتخابات میں نمایاں کامیابی حاصل کر سکتی ہے، اور ملک کی سیاست میں ایک نیا دور شروع ہونے کا امکان ہے۔

یہ صورتحال بنگلہ دیش کی سیاست میں ایک نیا موڑ پیش کر رہی ہے، جہاں عوامی دباؤ اور سیاسی جماعتوں کے مطالبات کے درمیان عبوری حکومت کو توازن قائم کرنا چیلنج بن چکا ہے۔