وزیر اعظم کے مشیر برائے سیاسی امور رانا ثنا اللہ نے بڑا پالیسی بیان دیتے ہوئے بھارت کے بزدلانہ حملوں کا جواب مکمل ہونے کا اعلان کردیا ہے۔

بول نیوز کے مطابق رانا ثنا اللہ نے کہا کہ بھارت نے پہل کی تھی، ہم نے نہیں کی تھی، ہم نے تو صرف بھارت کو جواب دیا ہے۔ انھوں نے کہا کہ بھارت نے حملہ کیا ہم نے وعدے کے مطابق بھرپور جواب دے دیا۔

رانا ثنا اللہ نے کہا کہ بھارت اب کچھ نہیں کرے گا تو ہم بطور ذمہ دار ریاست کچھ نہیں کریں گے، انھوں نے کہا کہ ہم نے دنیا کو بتادیا ہے کہ اگر بھارت کچھ نہیں کرے گا تو ہم بھی کچھ نہیں کریں گے ۔

یاد رہے کہ گزشتہ رات بھارتی فوج نے بزدلانہ کارروائی کرتے ہوئے آزاد کشمیر کے علاقے کوٹلی، مظفر آباد، باغ کے علاوہ پنجاب کے مریدکے اور احمد پور شرقیہ میں شہری آبادی کو نشانہ بنایا۔ اس حملے میں 2 مساجد شہید ہوئیں، جبکہ دو بچوں سمیت 26 پاکستانی شہری شہید اور 46 زخمی ہوئے۔

پاک فوج نے بھارتی جارحیت کا بھرپور جواب دیتے ہوئے بھارتی فضائیہ کے 3 رافیل، ایک سکوئی، ایک مگ 29 اور ایک ڈرون کو تباہ کر دیا۔ اس کے علاوہ، بھارتی فوج کا بریگیڈ ہیڈ کوارٹر بھی تباہ کردیا۔

پاک فوج کی مؤثر کارروائی کے بعد بھارتی فوج نے لائن آف کنٹرول پر سفید جھنڈا لہرا کر شکست تسلیم کر لی۔