پاکستان کے صوبہ پنجاب میں حالیہ موسمی تبدیلیوں کی وجہ سے آندھی اور بارش کی پیش گوئی کی گئی ہے، جس پر پی ڈی ایم اے پنجاب نے تمام متعلقہ اداروں کو ہنگامی حالات سے نمٹنے کے لیے الرٹ کر دیا ہے۔

صوبہ بھر کے ڈپٹی کمشنرز اور ریسکیو اداروں کو ہدایات دی گئی ہیں کہ وہ ہر ممکن اقدامات کریں تاکہ شہریوں کی حفاظت کو یقینی بنایا جا سکے۔

پی ڈی ایم اے پنجاب کے ڈائریکٹر جنرل، عرفان علی کاٹھیا نے تمام متعلقہ محکموں اور اداروں کو ہدایات جاری کرتے ہوئے کہا کہ صوبے میں خراب موسم اور آسمانی بجلی کی گرج چمک کے دوران شہریوں کو احتیاطی تدابیر اختیار کرنی ہوں گی۔

انہوں نے مزید کہا کہ تمام اضلاع کے ڈسٹرکٹ ایمرجنسی آپریشن سنٹرز اور صوبائی کنٹرول روم کو 24/7 مانیٹرنگ کی ہدایت کی گئی ہے تاکہ کسی بھی ہنگامی صورتحال کا فوری طور پر مقابلہ کیا جا سکے۔

مزید پڑھیں: بارشیں ہی بارشیں، 27 مئی سے ملک میں طوفانی موسم کا بڑا الرٹ جاری

ڈی جی پی ڈی ایم اے نے شہریوں سے درخواست کی ہے کہ وہ آسمانی بجلی سے بچاؤ کے لیے محفوظ مقامات پر رہیں اور خراب موسم کے دوران کھلے مقامات پر نہ رکیں۔

مزید برآں انہوں نے آندھی و طوفان کے دوران محفوظ مقامات پر رہنے اور غیر ضروری سفر سے پرہیز کرنے کی ہدایات بھی دی ہیں۔

انہوں نے مزید کہا کہ بجلی کے کھمبوں اور لٹکتی ہوئی تاروں سے دور رہنا بہت ضروری ہے، شہریوں کو گاڑی آہستہ چلانے اور کھلی جگہوں پر رکنے سے گریز کرنے کی بھی ہدایت کی گئی ہے۔

پی ڈی ایم اے پنجاب نے عوام کو یاد دلایا ہے کہ آندھی اور بارش کے دوران کسی بھی ہنگامی صورتحال سے نمٹنے کے لیے پی ڈی ایم اے کی ہیلپ لائن 1129 پر کال کر سکتے ہیں۔