ترجمان پاک فوج لیفٹیننٹ جنرل احمد شریف چوہدری نے کہا ہے کہ بھارت کی طرف سے کسی بھی قسم کی جنگ بندی کی خلاف ورزی یا پاکستان کی خودمختاری کو چیلنج کرنے کی کوشش کا تیز اور فیصلہ کن جواب دیا جائے گا۔

انہوں نے یہ بات معروف برطانوی نشریاتی ادارے اسکائی نیوز کو دیے گئے انٹرویو میں کہی۔

ڈی جی آئی ایس پی آر کا کہنا تھا کہ جو بھی ہماری سرزمین، سالمیت اور خودمختاری کی خلاف ورزی کرنے کی کوشش کرے گا، ہمارا جواب بے رحمانہ ہو گا۔

لیفٹیننٹ جنرل احمد شریف نے بھارت کو واضح انتباہ کرتے ہوئے کہا کہ اگر بھارت یہ سمجھتا ہے کہ وہ پاکستان کے خلاف جنگ کا محاذ کھڑا کر سکتا ہے تو یہ پورے خطے کے لیے تباہی کا باعث بنے گا، کیونکہ دونوں ممالک ایٹمی طاقتیں ہیں۔

مزید پڑھیں: مکمل تیاری کے ساتھ جواب دیا، بھارت کو 3 ارب ڈالر کا نقصان پہنچایا، اسحاق ڈار

انہوں نے مزید کہا کہ امریکا اور دیگر عالمی طاقتیں اس بات سے بخوبی آگاہ ہیں کہ خطے میں کشیدگی کسی بھی وقت سنگین صورت اختیار کر سکتی ہے۔

ڈی جی آئی ایس پی آر نے بھارت کے اس مؤقف کو مسترد کیا کہ کشمیر ایک اندرونی معاملہ ہے۔

ان کے مطابق بھارت مقبوضہ کشمیر میں بڑی فوجی موجودگی کے ذریعے کشمیری عوام کو ہراساں کر رہا ہے، اور ان کے حق خودارادیت کو دبانے کی کوشش کر رہا ہے۔

انہوں نے واضح کیا کہ مسئلہ کشمیر کو اقوام متحدہ کی سلامتی کونسل کی قراردادوں کے مطابق کشمیری عوام کو ہی حل کرنا ہوگا۔

مزید پڑھیں: “بُنْيَانٌ مَّرْصُوْصٌ”؛ پاک فوج کا دشمن کے ٹھکانوں پر فتح 1 اور 2 میزائل سسٹم سے حملے کی ویڈیو منظر عام پر

اسکائی نیوز کی رپورٹ کے مطابق پاکستان نے بھارت کی بڑی مسلح افواج کے باوجود ایک بڑی فوجی برتری حاصل کی ہے۔

رپورٹ میں مزید کہا گیا کہ بھارت اس پر بھی برہم ہے کہ امریکہ نے حالیہ بحران کے دوران مسئلہ کشمیر کو عالمی سطح پر اجاگر کیا ہے۔

رپورٹ کے مطابق اس بحران میں امریکہ کا اصل امتحان یہ ہے کہ وہ بھارت پر کتنا دباؤ ڈال سکتا ہے تاکہ وہ کشیدگی میں کمی لائے اور انسانی حقوق کی خلاف ورزیاں بند کرے۔

اسکائی نیوز کا کہنا ہے کہ واشنگٹن اب اس نکتے پر غور کر رہا ہے کہ جنوبی ایشیا میں اسٹریٹجک توازن کو کیسے برقرار رکھا جائے۔