انٹرنیشنل کرکٹ کونسل (آئی سی سی) کو ورلڈ ٹیسٹ چیمپئن شپ کے فائنل کے پرومو میں چیئرمین جے شاہ کی بار بار تشہیر پر شدید تنقید کا سامنا ہے۔

آئی سی سی کی جانب سے جاری کردہ 45 سیکنڈز کی اس ویڈیو میں جے شاہ کو 11 مرتبہ دکھایا گیا ہے، جبکہ جنوبی افریقی کھلاڑیوں کو مجموعی طور پر اتنی ہی بار دکھایا گیا۔

یاد رہے کہ لارڈز کے تاریخی میدان میں آئی سی سی ٹیسٹ چیمپئن شپ کا فائنل ہوا اور جنوبی افریقا نے آسٹریلیا کو ہراکر طویل عرصے بعد آئی سی سی ٹائٹل جیتا۔

مزید پڑھیں: آئی سی سی کی سالانہ رینکنگ جاری، پاکستانی ٹیم تینوں فارمیٹ میں تنزلی کا شکار

آئی سی سی نے سوشل میڈیا پر فائنل کے حوالے سے ایک پرومو جاری کیا جسے دیکھ کر فینز یہ کہنے پر مجبور ہوگئے کہ یہ پرومو ورلڈ ٹیسٹ چیمپئن شپ کے فائنل کا تھا یا جے شاہ کی وہاں پر موجودگی کا؟

پرومو کے آغاز میں لارڈز کا ایک شاٹ اور پھر بالی ووڈ کے مافیا کنگ کی طرح انٹری دیتے جے شاہ کا شاٹ تھا۔

اس 45 سیکنڈز کی ویڈیو میں مجموعی طور پر 23 مختلف شاٹس ہیں جس میں جے شاہ ایک نہیں، دو نہیں، تین نہیں بلکہ پورے 11 مرتبہ دکھایا گیا ہے۔

مزید پڑھیں: بھارت کو آئی سی سی ریونیو سے زیادہ حصہ ملنے پر ڈبلیو سی اے کی سخت تنقید، نیا فارمولا تجویز

اس ویڈیو میں فاتح کپتان ٹیمبا باووما کی جھلک صرف پانچ مرتبہ، سنچری میکر مارکرم کو دو بار اور پیٹ کمنز کو صرف ایک بار دکھایا گیا۔

سوشل میڈیا پر اس ویڈیو کو لے کر صحافیوں اور مداحوں نے آئی سی سی اور جے شاہ کو تنقید کا نشانہ بنایا۔

سری لنکن صحافی اینڈریو فیڈل فرنانڈو نے سوال اٹھایا کہ جے شاہ نے ورلڈ ٹیسٹ فائنل میں کتنے رنز بنائے یا کتنی وکٹیں لیں۔

بھارتی صحافی کلدیپ لال نے ویڈیو کو ناقابل یقین قرار دیتے ہوئے آئی سی سی کی سوشل میڈیا ٹیم پر تنقید کی۔

مزید پڑھیں: 29 سال بعد آئی سی سی ایونٹ کی پاکستان میں میزبانی، شاندار افتتاحی تقریب

برطانوی صحافی عاطف نواز نے کہا کہ شاید ویڈیو جے شاہ نے خود ایڈیٹ کی ہو۔ آسٹریلوی صحافی کا کہنا تھا کہ ویڈیو دیکھتے ہوئے اگر آپ کی آنکھ ایک لمحے کے لیے بھی جھپکی تو آپ پیٹ کمنز کا ایک شاٹ بھی مس کر دیں گے۔

ایک سوشل میڈیا صارف نے تبصرہ کیا کہ شاید لوگ جے شاہ کو دیکھنے آئے تھے، اچانک کرکٹ میچ شروع ہو گیا۔

اس ویڈیو میں جے شاہ کی بار بار تشہیر پر مداحوں نے آئی سی سی پر جانبداری کا الزام عائد کیا ہے۔ ان کا کہنا ہے کہ اس ویڈیو میں جے شاہ کی موجودگی کو بڑھا چڑھا کر پیش کیا گیا ہے، جب کہ فائنل کے کھلاڑیوں کو کم دکھایا گیا۔