پاکستان کے جیولن تھرو کے اولمپک گولڈ میڈلسٹ ارشد ندیم کو عالمی جریدے فوربز نے اپنی 30 انڈر 30 ایشیا کی فہرست میں شامل کر لیا ہے۔

یہ اعزاز انہیں 2024 پیرس اولمپکس میں 92.97 میٹر کی تھرو کے ساتھ گولڈ میڈل جیتنے پر دیا گیا۔ یہ کارنامہ پاکستان کے لیے تاریخی اہمیت کا حامل ہے، کیونکہ یہ ملک کا پہلا انفرادی اولمپک سونے کا تمغہ ہے۔

فوربز نے ارشد ندیم کی اس کامیابی کو “اسٹننگ شو” قرار دیتے ہوئے اسے انفرادی کھیلوں میں پاکستان کا اب تک کا پہلا سونے کا تمغہ اور 30 سال سے زائد عرصے میں پاکستان کا پہلا طلائی تمغہ قرار دیا۔

مزید پڑھیں: ارشد ندیم نے ایشیئن ایتھلیٹکس چیمپیئن شپ میں 52 سال بعد ریکارڈ قائم کر دیا

ارشد ندیم کا یہ کارنامہ نہ صرف ان کی ذاتی محنت کا نتیجہ ہے بلکہ یہ پاکستان کے لیے بھی ایک سنگ میل کی حیثیت رکھتا ہے۔ ان کی اس کامیابی سے ملک میں کھیلوں کے فروغ اور کھلاڑیوں کی حوصلہ افزائی کے لیے نئے دروازے کھلیں گے۔

ارشد ندیم کی اس کامیابی پر فوربز کی جانب سے انہیں 30 انڈر 30 ایشیا کی فہرست میں شامل کرنا ایک بڑا اعزاز ہے اور یہ ان کی عالمی سطح پر پہچان کا غماز ہے۔

پنجاب کے چھوٹے شہر میاں چنوں سے بین الاقوامی سطح پر پذیرائی تک ان کے سفر نے انہیں پورے جنوبی ایشیا کے نوجوان کھلاڑیوں کے لیے ایک تحریک بنا دیا ہے۔

اولمپکس میں کامیابی کے بعد ان کو پنجاب اور سندھ سے 15 کروڑ 30 لاکھ روپے سے زیادہ کے کیش انعامات موصول ہوئے تھے۔

اس کے علاوہ حکومت نے اسلام آباد کی ایک سڑک کا نام ارشد ندیم کے نام پر رکھا جبکہ پاکستان پوسٹ نے یومِ آزادی پر ایک یادگاری اسٹیمپ بھی جاری کیا تھا۔