ایرانی وزیر خارجہ عباس عراقچی نے کہا ہے کہ ایران اپنی یورینیم افزودگی کا پروگرام ترک نہیں کرے گا، کیونکہ یہ ایرانی سائنسدانوں کی محنت کا نتیجہ اور قومی فخر کا مسئلہ ہے۔

تاہم، انہوں نے امریکہ کے ساتھ مذاکرات کے لیے آمادگی کا اظہار بھی کیا ہے۔

مزید پڑھیں: ایران اور 3 یورپی ممالک کے درمیان جوہری مذاکرات جمعہ کو ہوں گے

فاکس نیوز کو دیے گئے انٹرویو میں عباس عراقچی نے کہا کہ حالیہ امریکی اور اسرائیلی فضائی حملوں سے ایران کا افزودگی پروگرام شدید متاثر ہوا ہے، لیکن ایران اسے ہرگز نہیں چھوڑے گا۔

ان کے بقول: “یہ اب صرف ایک ٹیکنیکل معاملہ نہیں بلکہ قومی وقار کا سوال ہے۔”

انہوں نے مزید کہا کہ ایران فی الحال امریکہ کے ساتھ براہ راست مذاکرات کے لیے تیار نہیں، لیکن اگر واشنگٹن “ون-ون حل” چاہتا ہے، تو ایران مذاکرات کے لیے تیار ہے۔

مزید پڑھیں: ایرانی صدر نے سرکاری گاڑی چھوڑ کر ٹیکسی کیوں لی؟ وجہ حیران کن

عراقچی نے کہا کہ ایران ہر وہ قدم اٹھانے کو تیار ہے جس سے ثابت ہو کہ اس کا نیوکلیئر پروگرام پُرامن ہے، اور وہ کبھی ایٹمی ہتھیار بنانے کی طرف نہیں جائے گا۔ جواباً انہوں نے امریکی پابندیاں ختم کرنے کا مطالبہ کیا۔

عراقچی کے مطابق، ایران بین الاقوامی ایٹمی توانائی ایجنسی (IAEA) کے ساتھ تعاون ختم نہیں کر رہا، تاہم موجودہ حالات میں ایجنسی کی انسپیکشن سے متعلق فیصلے “غور و فکر” کے بعد کیے جائیں گے۔

ان کا کہنا تھا کہ ایرانی ایٹمی توانائی تنظیم اب بھی حملوں کے اثرات کا جائزہ لے رہی ہے اور جلد IAEA کو آگاہ کیا جائے گا۔

مزید پڑھیں: ایران نے اسرائیل پر فائرہرمیزائل حملے کی پیشگی اطلاع دیدی تھی، ٹرمپ کا دعویٰ

انہوں نے اس بات کی بھی تصدیق کی کہ ایران اور امریکہ کے درمیان مئی میں نئے معاہدے پر بات چیت ہوئی تھی، لیکن اسرائیلی بمباری کے بعد مذاکرات تعطل کا شکار ہو گئے۔

یاد رہے کہ اسرائیل نے 13 جون کو ایران پر اچانک حملے شروع کیے تھے، جن میں 900 سے زائد افراد جاں بحق ہوئے، جبکہ ایران کے جوابی حملوں میں اسرائیل میں 28 ہلاکتیں ہوئیں۔

ادھر اقوام متحدہ کے سیکرٹری جنرل کے ترجمان نے ایران اور یورپی ممالک کے درمیان ترکی میں طے شدہ مذاکرات کا خیرمقدم کیا ہے۔

یورپی فریقین نے واضح کیا ہے کہ اگر ایران نے مذاکرات بحال نہ کیے تو اس پر دوبارہ عالمی پابندیاں عائد کی جا سکتی ہیں۔