پاکستان کرکٹ ٹیم کے ہیڈ کوچ اظہر محمود نے لاہور میں جاری ٹیسٹ میچ کے بعد پریس کانفرنس کرتے ہوئے ٹیم کی کارکردگی، خامیوں اور مستقبل کی حکمت عملی پر کھل کر اظہار خیال کیا۔

 ان کا کہنا تھا کہ ہم نے خود کو اس صورتحال میں ڈالا، اب بھرپور کوشش کریں گے کہ ہدف کا دفاع کر سکیں۔

اظہر محمود نے ٹیم کی بیٹنگ پر تنقید کرتے ہوئے کہا کہ غلط شاٹس کی وجہ سے بڑا اسکور نہیں کر سکے، دوسری اننگز میں پارٹنرشپس نہیں لگ سکیں، جو کہ ہمارے لیے نقصان دہ ثابت ہوا۔

انہوں نے تسلیم کیا کہ ہماری کمزوریاں سب کے سامنے آ چکی ہیں، اور ان پر کام کرکے بہتری لانا ضروری ہے۔

ہیڈ کوچ کا کہنا تھا کہ اس پچ پر جس نے اچھی بیٹنگ کی وہی اسکور کرنے میں کامیاب رہا، لیکن ہماری ٹیم میں کھلاڑیوں نے تیس کو پچاس کیا، مگر سنچری میں تبدیل نہیں کر سکے، جو ایک بڑی خامی ہے۔

میچ کی صورتحال پر بات کرتے ہوئے انہوں نے کہا کہ ٹیم کو اب بھی یقین ہے کہ موقع ہے کہ ہم ہدف کا دفاع کر لیں، خاص طور پر اگر باؤلرز مستقل وکٹیں حاصل کریں۔

شاہین شاہ آفریدی کو اوپننگ پر بھیجنے کے فیصلے پر سوال کیا گیا تو اظہر محمود نے کہا کہ شاہین کو اس لیے بھیجا تاکہ وہ جلدی اسکور کریں اور مخالف ٹیم پر دباؤ ڈالیں۔

فاسٹ باؤلنگ کے حوالے سے گفتگو کرتے ہوئے ہیڈ کوچ نے بتایا کہ میچ کی کنڈیشنز ایسی تھیں کہ فاسٹ باؤلرز کو زیادہ موقع نہیں ملا، ہمارا اندازہ تھا کہ میچ میں ریورس سوئنگ کا کردار ہوگا، مگر ایسا نہیں ہو سکا۔