غزہ میں کئی ماہ سے جاری تباہ کن جنگ کے خاتمے اور پائیدار امن کی بحالی کے لیے مصر میں جاری بالواسطہ مذاکرات میں فلسطینی تنظیم حماس نے اسرائیل کے ساتھ جنگ بندی کے لیے چھ اہم شرائط پیش کر دی ہیں۔

امریکی نشریاتی ادارے سی این این کے مطابق یہ شرائط ڈونلڈ ٹرمپ کے 20 نکاتی امن منصوبے پر بات چیت کے دوران سامنے آئیں، جس میں فریقین سے فوری جنگ بندی پر رضامندی طلب کی گئی ہے۔

دوسری جانب اسرائیل کی طرف سے تاحال حماس کی ان شرائط پر کوئی باضابطہ ردعمل سامنے نہیں آیا۔

حماس کے ترجمان اور سینئر رہنما فوزی برھوم کا کہنا ہے کہ تنظیم ایک ایسے معاہدے کے لیے کوشاں ہے جو فلسطینی عوام کے دیرینہ مطالبات، خودمختاری اور انسانی وقار کی حقیقی ترجمانی کرے۔

حماس کی جانب سے پیش کی گئی بنیادی شرائط درج ذیل ہیں:

مستقل اور مکمل جنگ بندی — اسرائیلی جارحیت کا خاتمہ اور کسی بھی نئے فوجی آپریشن پر مکمل پابندی۔

اسرائیلی فوج کا مکمل انخلا — غزہ سے ہر قسم کی عسکری موجودگی کا خاتمہ۔

انسانی امداد کی مکمل بحالی — خوراک، ادویات، پانی اور دیگر بنیادی اشیاء کی ترسیل میں کسی قسم کی رکاوٹ نہ ہو۔

جبری بے دخلی کا خاتمہ — تمام بے گھر فلسطینیوں کی واپسی کی ضمانت دی جائے۔

قیدیوں کا تبادلہ — فلسطینی قیدیوں کی رہائی کے لیے ایک شفاف اور منصفانہ معاہدہ طے کیا جائے۔

غزہ کی تعمیر نو — فوری بحالی کے لیے ایک آزاد فلسطینی ماہرین پر مشتمل تکنیکی کمیٹی کی نگرانی میں تعمیری عمل شروع کیا جائے۔

فوزی برھوم نے اسرائیلی وزیراعظم بنیامن نیتن یاہو پر الزام عائد کیا کہ وہ ماضی کی طرح اس بار بھی مذاکرات کو ناکام بنانے کی کوشش کر رہے ہیں۔

ان کے بقول نیتن یاہو ہر مرحلے پر رکاوٹیں ڈال کر پائیدار امن کی راہ میں جان بوجھ کر دیوار کھڑی کرتے آئے ہیں۔

حماس کے مطابق فلسطینی عوام کسی ایسے منصوبے کو قبول نہیں کریں گے جو ان کے قومی مفاد، آزادی اور حق خودارادیت کو نقصان پہنچائے۔

یہ مذاکرات ایسے وقت ہو رہے ہیں جب غزہ میں اسرائیلی فضائی اور زمینی کارروائیوں نے انسانی زندگی کو مفلوج کر کے رکھ دیا ہے۔

اقوام متحدہ کے مطابق لاکھوں افراد بے گھر، بنیادی سہولیات تباہ اور خوراک و پانی کی شدید قلت پیدا ہو چکی ہے۔

مصر اور دیگر ثالثی قوتیں امید کر رہی ہیں کہ یہ بات چیت نہ صرف فوری جنگ بندی کی راہ ہموار کرے گی بلکہ خطے میں طویل المدتی استحکام کے لیے بھی سنگ میل ثابت ہو گی۔