پاک فوج کے چیف آف جنرل اسٹاف لیفٹیننٹ جنرل سید عامر رضا نے ریاض میں شاہی سعودی مسلح افواج کے چیف آف جنرل اسٹاف جنرل فیاض بن حمید الرویلی سے اہم ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران دونوں عسکری رہنماؤں نے دوطرفہ دفاعی تعلقات اور اسٹریٹیجک مفادات پر تفصیل سے گفتگو کی۔

ملاقات میں دفاعی تعاون کے فروغ، انٹر آپریبلٹی میں اضافے اور اسٹریٹیجک میوچوئل ڈیفنس ایگریمنٹ (SMDA) کے تحت تعاون کو مزید مضبوط بنانے پر بھی بات چیت کی گئی۔

دونوں ممالک نے اپنے برادرانہ تعلقات کو مزید گہرا کرنے کے عزم کا اعادہ کیا، اور دفاعی شعبے میں باہمی اشتراک کے امکانات کو مزید وسیع کرنے پر زور دیا۔

لیفٹیننٹ جنرل سید عامر رضا نے اس موقع پر سعودی دفاعی فورسز کی استعداد کار میں اضافے کے لئے پاکستان کی مکمل معاونت کا عزم ظاہر کیا۔

انہوں نے کہا کہ پاکستان اور سعودی عرب کا مضبوط دفاعی اشتراک نہ صرف دوطرفہ تعلقات کے لیے اہم ہے بلکہ یہ علاقائی امن، استحکام اور خود انحصاری میں بھی کلیدی کردار ادا کرتا ہے۔

سعودی قیادت نے پاکستان کی دہشت گردی کے خلاف جنگ میں قربانیوں اور علاقائی امن و استحکام کے حوالے سے پاکستان کے کردار کو سراہا اور اس کے عزم کو تسلیم کیا۔