تیل و گیس کے سرکاری ادارے آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے اپنی کامیابیوں کا سلسلہ جاری رکھتے ہوئے پاساکھی 14 کنویں سے تیل کی باقاعدہ پیداوار شروع کر دی ہے۔

کمپنی کے مطابق نئے کنویں سے یومیہ 1100 بیرل خام تیل حاصل کیا جا رہا ہے جو ملک میں توانائی کے شعبے کے لیے ایک خوش آئند پیش رفت ہے۔

او جی ڈی سی ایل کے مطابق پاساکھی اور پاساکھی نارتھ ڈی اینڈ پی ایل میں کمپنی کا ورکنگ انٹرسٹ 100 فیصد ہے، جس کے باعث یہاں ہونے والی تمام پیش رفت کا براہِ راست فائدہ او جی ڈی سی ایل اور قومی معیشت کو پہنچے گا۔

کمپنی نے بتایا کہ پاساکھی 14 کی ڈرلنگ 2183 میٹر گہرائی تک کامیابی سے مکمل کی گئی۔ اس اہم منصوبے میں پہلی بار جدید ڈرلنگ ٹیکنالوجیز RSS، MWD اور Nitrified Mud System کا استعمال کیا گیا، جس سے ڈرلنگ کی کارکردگی بہتر ہوئی اور پیداواری امکانات میں اضافہ ہوا۔

مزید برآں کنویں میں جدید ESP (Electric Submersible Pump) ٹیکنالوجی نصب کی گئی ہے،جس سے کنویں کی پیداواری کارکردگی میں نمایاں بہتری آئے گی اور تیل کی مسلسل فراہمی کو یقینی بنایا جا سکے گا۔

او جی ڈی سی ایل کا کہنا ہے کہ ایکسپلوریشن اور ڈویلپمنٹ کے شعبے میں سرمایہ کاری کا سلسلہ جاری ہے، اور کمپنی مستقبل میں بھی نئے ذخائر کی تلاش اور ملکی توانائی کے وسائل میں اضافہ کرنے کے لیے پرعزم ہے۔