اگر خطرہ ہوا تو وینزویلا کے جنگی طیارے مار گرائے جائیں گے، صدر ٹرمپ

امریکی صدر ڈونلڈ ٹرمپ نے خبردار کیا ہے کہ اگر وینزویلا کے جنگی طیارے امریکی بحری جہازوں کے قریب پرواز کرتے ہیں اور خطرناک صورت حال پیدا کرتے ہیں تو انہیں مار گرایا جائے گا۔

یہ بیان اس وقت سامنے آیا ہے جب امریکی حکام کے مطابق وینزویلا نے جنوبی امریکہ کے ساحل کے قریب دو دنوں میں دوسری بار امریکی بحری جہاز کے نزدیک جنگی طیارے اڑا کر اشتعال انگیزی کی ہے۔

ٹرمپ کے اس بیان سے قبل امریکی افواج نے ایک کارروائی کے دوران ایک وینزویلا سے تعلق رکھنے والے منشیات بردار جہاز کو نشانہ بنایا، جس میں 11 افراد ہلاک ہوئے۔ امریکی حکام نے دعویٰ کیا ہے کہ یہ جہاز ایک جرائم پیشہ گروہ چلا رہا تھا۔

دوسری جانب وینزویلا کے صدر نکولس مادورو نے ان الزامات کو بے بنیاد قرار دیتے ہوئے کہا ہے کہ امریکہ کے ساتھ اختلافات کی بنیاد پر فوجی تصادم کی کوئی گنجائش نہیں۔

ان کا کہنا تھا کہ وینزویلا ہمیشہ مذاکرات اور مکالمے کے لیے تیار رہا ہے لیکن ہم باہمی احترام کے اصول پر قائم ہیں۔

جمعہ کو وائٹ ہاؤس میں صحافیوں سے گفتگو کرتے ہوئے جب ٹرمپ سے پوچھا گیا کہ اگر وینزویلا کے طیارے دوبارہ امریکی جہازوں کے قریب آئے تو کیا ہوگا؟ تو انہوں نے کہا کہ وینزویلا مشکل میں پڑ جائے گا۔

امریکی صدر نے اپنے ساتھ کھڑے جنرل کو مخاطب کرتے ہوئے کہا کہ اگر صورتحال بگڑتی ہے تو آپ جو چاہیں کر سکتے ہیں۔