اس دور جدید میں ہر چیز ڈیجیٹل انداز اختیار کرتی جارہی ہے یہاں تک زیورات بھی اب محض زیبائش کے لیے نہیں بلکہ صحت کی مانیٹرنگ کے لیے پہنے جارہے ہیں، اسی کو مد نظر رکھتے ہوئے بوسٹن کی انجینئرنگ کمپنی لومیا نے حال ہی میں اسمارٹ بالیاں متعارف کرائی ہیں جسے لومیا ٹو کا نام دیا گیاہے۔
بالیاں کی طرح دکھائی دینے والا یہ ٹریکر چھ برس میں تیارہوا ہے اور دماغ تک خون کے بہاؤ کی درست پیمائش کرنے کی صلاحیت رکھتا ہے۔
کیا آپ کو کبھی بہت تیزی سے کھڑے ہونے پر چکر آنے کا احساس ہوا ہے، دماغ میں خون کی کمی آپ کی توانائی، توجہ اور روزمرہ کی عمومی کیفیت پر براہِ راست اثر انداز ہوتی ہے۔ خون کا بہاؤ مسلسل بدلتا رہتا ہے اور مختلف چیزوں سے متاثر ہوتا ہے، جیسے کھانے کی مقدار، پانی اور کافی کا استعمال، نیند کا وقت، اور ورزش تاہم اگر یہ پتا چل جائے کہ یہ کس سے زیادہ متاثر ہوتا ہے تو اس طرح اسے آسانی سے کنٹرول کیا جاسکتا ہے اور لومیا ٹو اسی مسئلے کا حل پیش کرتی ہے۔
زیادہ تر ٹریکرز سبز روشنی استعمال کرتے ہیں اور کلائی یا انگلی کی سطحی شریانوں کی پیمائش کرتے ہیں، جو کم درست ڈیٹا فراہم کرتی ہیں۔ لیکن لومیا ٹو سر کی جانب خون کے بہاؤ میں کمی کا پتہ لگاتی ہے، یہی وہ خصوصیت ہے جو اسے دوسرے آلات سے منفرد بناتی ہے۔
اپنی انفراریڈ لائٹ سینسر ٹیکنالوجی کی بدولت، بائیں کان کی بالی میں موجود الیکٹرانکس پلیٹ فارم دماغ کے قریب ترین چھوٹی شریان میں شریانی خون کے بہاؤ کی پیمائش کرتا ہے۔
یہ بالیاں صرف خون کے بہاؤ کی ہی پیمائش نہیں کرتی بلکہ اس میں وہ تمام معیاری فیچرز جیسے دل کی دھڑکن اور نیند کے دورانیے کو نوٹ کرنا، ڈیلی ریڈینس، اور جسمانی درجہ حرارت کی پیمائش کرنا بھی شامل ہیں۔
یہ ڈیوائس صرف ان لوگوں کے لیے نہیں جو خون کے بہاؤ کی دائمی بیماریوں میں مبتلا ہیں بلکہ ہر شخص کو خون کے بہاؤ کے پیٹرن جاننے سے فائدہ ہو سکتا ہے۔
ان بالیوں کی بنانے میں پلاٹینم اور ٹائٹینیم کا استعمال کیا گیا اس طرح یہ الرجی پیدا کرنے سے پاک ہیں، اور مستقبل میں مختلف دیدہ زیب اسٹائلز میں دستیاب ہوں گی، ان بالیوں کے پیچھے ایک اسمارٹ کور ہے جس میں سینسرز، بیٹری اور پروسیسرز شامل ہیں اس طرح اسے کسی بھی بالی پر لگایا جا سکتا ہے۔
لومیا کمپنی کا دعویٰ ہے کہ یہ دنیا کا سب سے چھوٹا ویئریبل ٹریکر ہے، صرف ایک گرام وزن لیے یہ بالی ایئرپوڈ کے سائز کا پانچواں حصہ ہے۔
یہ بالیاں چوبیس گھنٹے پہننے کے لیے ڈیزائن کی گئی ہیں چاہے آپ سو رہے ہوں، ورزش کر رہے ہوں یا نہا رہے ہوں۔ انہیں چارج کرنے کے لیے اتارنے کی بھی ضرورت نہیں؛ ان میں ماڈیولر سوئیپ ایبل بیٹریز استعمال کی گئی ہے جسے آسانی سے نکالا اور بدلا جا سکتا ہے۔ ایک بیٹری پیک پانچ سے آٹھ دن تک چلتا ہے، جو عام ویئریبلز کے مقابلے میں خاصا بہتر ہے۔
کمپنی نے محض بالیاں ہی نہیں بنائی بلکہ مرد حضرات کے لیے ایئر کف کا آپشن بھی موجود ہے جس کے لیے کان چھدوانے کی ضرورت نہیں۔
