چینی کمپنی شاؤمی نے اپنی حالیہ سہ ماہی کی رپورٹ میں خبردار کیا ہے کہ اگلے سال اسمارٹ فونز کی قیمتیں مزید بڑھ سکتی ہیں۔
کمپنی کے مطابق بنیادی وجہ میموری چپس کی بڑھتی ہوئی قیمتیں ہیں جو عالمی سطح پر ایک سنگین مسئلہ بن چکی ہیں اور اس کی وجہ اے آئی کے تیز رفتار بڑھاؤ ہیں۔
شاؤمی کا کہنا ہے کہ میموری چپس بنانے والی کمپنیاں، جیسے سام سنگ، موبائل چپس کی پیداوار کم کرکے زیادہ تر پیداوار ڈیٹا سینٹرز کے لیے کر رہی ہیں، جہاں اے آئی ہارڈویئر کی مانگ بہت زیادہ ہے۔
کمپنی نے بتایا کہ اس تبدیلی کی وجہ سے میموری کی قیمتیں پوری انڈسٹری میں بڑھ رہی ہیں اور اسمارٹ فون بنانے والی کمپنیاں اس کے اثرات محسوس کررہی ہیں۔
شاؤمی کے صدر لو ویبنگ نے کہا کہ یہ تبدیلی 2026 میں لانچ ہونے والے فونز کی قیمتوں پر اثر ڈالے گی۔
انہوں نے وضاحت کی کہ اگلے سال پیداوار کے اخراجات پر دباؤ اس سال کے مقابلے میں بہت زیادہ ہوگا اور صارفین کو مصنوعات کی قیمتوں میں اہم اضافہ متوقع ہے۔
لو ویبنگ نے یہ بھی بتایا کہ قیمتیں بڑھانا ضروری ہوسکتا ہے لیکن یہ مکمل طور پر بڑھتے ہوئے مینوفیکچرنگ اخراجات کو پورا نہیں کرے گا۔
اس سے ظاہر ہوتا ہے کہ گزشتہ چند سالوں میں اسمارٹ فونز کی قیمتیں بڑھتی رہنے کا رجحان مستقبل میں بھی جاری رہنے والا ہے۔
