چین سے تعلق رکھنے والے شخص نے ایک غیر معمولی طویل مدت تک لیٹے رہنے کا مقابلہ جیت لیا، یہ کامیابی انہوں نے 33 گھنٹے لگاتار گدے پر لیٹ کر حاصل کی۔
اس منفرد مقابلے میں شامل شرکاء کو گدے یا بستر پر زیادہ سے زیادہ دیر تک لیٹے رہنا تھا، یہاں تک کہ انہیں بیت الخلا جانے کی بھی اجازت نہیں تھی۔
اس مقابلے کا انعقاد لائنگ فلیٹ نامی اصطلاح سے متاثر ہوکر کیا گیا، یہ ایک چینی سماجی رجحان اور احتجاجی تحریک ہے جس میں نوجوان کم تناؤ والے طرز زندگی کو اپنانے کے لیے سخت محنت اور مسابقت کے شدید کلچر کو مسترد کرتے ہیں۔ اس میں کیریئر کی ترقی، گھر کی ملکیت، شادی اور بچوں جیسے اہداف سے گریز کرنے کے لیے کم سے کم کام کرنا شامل ہے۔ یہ تحریک معاشی دباؤ اور محدود سماجی نقل و حرکت کے ردعمل کے طور پر سامنے آئی ہے، اور اس تحریک نے مادی کامیابی پر سادہ ضروریات اور ذاتی سکون کی زندگی کو ترجیح دی ہے۔
یہ بھی پڑھیں: چین نے 11,787 ڈرونز کے لائٹ شو کا نیا عالمی اعزاز اپنے نام کر لیا
15 نومبر کو، 240 شرکاء چین کے اندرونی منگولیا صوبے کے باؤتو شہر کے شاپنگ سینٹر میں اس غیر معمولی مقابلے میں حصہ لینے کے لیے جمع ہوئے۔
اس مقابلے کے قواعد کافی سادہ تھے، شرکاء کو گدے پر سیدھا لیٹے رہنا تھا، اگرچہ انہیں گدے پر کروٹیں بدلنے، کتابیں پڑھنے، کھانے یا اسمارٹ فون استعمال کرنے کی اجازت تھی، لیکن وہ گدے سے اٹھ نہیں سکتے تھے اور نہ ہی بیت الخلا جا سکتے تھے۔ تاہم جو بھی شخص ان تمام اصولوں اور قوائد پر عمل کرتے ہوئے سب سے آخر تک لیٹا رہے گا وہ فاتح قرار پائے گا۔
اگرچہ مقابلے کے لیے کوئی وقت مقرر نہیں تھا، تاہم ابتدائی 24 گھنٹوں میں ہی 186 شرکاء باہر ہو گئے، جبکہ اگلے 30 گھنٹے بعد مقابلے میں صرف چند ہی افراد باقی رہ گئے۔
33 گھنٹے اور 9 منٹ پر صرف 3 شرکاء مقابلے میں بچے، پھر دو منٹ بعد ایک اور شخص باہر ہو گیا۔ باقی دو شرکاء نے مزید 20 منٹ سے زیادہ تک مقابلہ جاری رکھا، اور بالآخر 33 گھنٹے اور 35 منٹ پر ایک نے ہمت ہار دی، جبکہ دوسرے کو فاتح قرار دے دیا گیا۔
چینی میڈیا نے رپورٹ کیا کہ اس مقابلے حصہ لینے والوں نے بیت الخلا جانے سے بچنے کے لیے ڈائپرکا استعمال کیا، جس پر کو ئی جرمانہ عائد نہیں کیا گیا۔
اس مقابلے کے فاتح کو 3000 یوان (420 ڈالر) بطورانعام دیا گیا، جبکہ دوسرے نمبر پر آنے والے کو 2000 یوان (280 ڈالر) اور تیسرے نمبر پر آنے والے نے 1000 یوان (140 ڈالر) حاصل کیے۔
میڈیا رپورٹس کے مطابق یہ مقابلہ چین میں بے حد مقبول ہوا، جسے 33 گھنٹے اور 35 منٹ کے دوران کروڑوں لوگوں نے لائیو اسٹریم پر دیکھا۔
