بھارت نے نیپال کو سات وکٹوں سے شکست دے کر پہلا بلائنڈ ویمنز ٹی ٹوئنٹی ورلڈ کپ جیت لیا۔
بھارت نے ٹاس جیت کر پہلے فیلڈنگ کا فیصلہ کیا اور نیپال کو 114 رنز پر محدود کر دیا۔ جواب میں بھارتی ٹیم نے صرف 12 اوورز میں تین وکٹوں کے نقصان پر 117 رنز بنا کر ایونٹ کی ناقابلِ شکست چیمپئن بننے کا اعزاز حاصل کیا۔
مزید پڑھیں: ٹی ٹوئنٹی بلائنڈ کرکٹ ورلڈکپ کے چوتھے ایڈیشن کے شیڈول کا اعلان
ٹورنامنٹ میں آسٹریلیا، پاکستان، سری لنکا اور امریکا بھی شامل تھے۔
بھارت کی فولا سارین نے 27 گیندوں پر 44 رنز کی شاندار اننگز کھیلی جبکہ نیپال کی ساریتا گھمیری 38 گیندوں پر 35 رنز کے ساتھ نمایاں رہیں۔
فائنل سری لنکا کے سب سے قدیم ٹیسٹ اسٹیڈیم پی سراوانامُتو اسٹیڈیم میں کھیلا گیا۔
واضح رہے کہ بلائنڈ کرکٹ میں سفید پلاسٹک گیند استعمال ہوتی ہے جس میں بیئرنگز ہوتے ہیں تاکہ گیند کے رول کرنے کی آواز سے کھلاڑی اسے ٹریس کر سکیں۔
مزید پڑھیں: ورلڈ بلائنڈ کرکٹ کونسل کا بڑا فیصلہ، بھارت سے ویمنز بلائنڈ ورلڈ کپ کی میزبانی واپس لے لی گئی
باؤلر گیند پھینکنے سے قبل بیٹر سے تیار ہونے کا سوال کرتا ہے اور ’’پلے‘‘ کہہ کر انڈر آرم، کم از کم ایک باؤنس کے ساتھ گیند کرواتا ہے۔
ہر ٹیم میں 11 کھلاڑی ہوتے ہیں جن میں کم از کم 4 مکمل نابینا (B1) ہونا ضروری ہیں۔ فیلڈرز اپنی پوزیشن بتانے کے لیے تالی بجاتے ہیں۔
جزوی طور پر نابینا کھلاڑیوں کی درجہ بندی B2 اور B3 کے مطابق کی جاتی ہے۔ B1 کھلاڑی کے بنائے گئے ہر رن کو دو رنز شمار کیا جاتا ہے۔
