Tue, 21-Oct-2025

تازہ ترین خبریں:

ٹرائی نیشن ٹی 20 سیریز، سری لنکا نے زمبابوے کو 9 وکٹوں سے شکست دے دی

ٹرائی نیشن سیریز میں پاکستان پہلے ہی فائنل میں پہنچ چکا ہے

ٹرائی نیشن ٹی ٹوئنٹی سیریز کے پانچویں مقابلے میں سری لنکن ٹیم نے زمبابوے کو یکطرفہ انداز میں 9 وکٹوں سے شکست دے کر ایونٹ میں اپنی جگہ برقرار رکھنے کی امیدیں روشن کر لی ہیں۔

راولپنڈی اسٹیڈیم میں کھیلے گئے میچ میں زمبابوے کے کپتان سکندر رضا نے ٹاس جیت کر پہلے بیٹنگ کا فیصلہ کیا۔

زمبابوین بیٹرز نے شروع میں مشکلات کا سامنا کیا اور ابتدائی دو وکٹیں صرف 17 رنز پر گر گئیں، تاہم بعد میں آنے والے کھلاڑیوں نے ذمہ دارانہ بیٹنگ کی۔

زمبابوے نے مقررہ 20 اوورز میں 5 وکٹوں کے نقصان پر 146 رنز اسکور کیے۔

سکندر رضا 37، برائن بینیٹ 34 جبکہ ریان برل 37 رنز بنا کر ناٹ آؤٹ رہے۔

سری لنکا کی جانب سے مہیش تھیکشانا اور ونندو ہاسارنگا نے 2،2 اور داسن شناکا نے ایک وکٹ حاصل کی۔

ہدف کا تعاقب میں سری لنکا کی جارحانہ بیٹنگ

147 رنز کے تعاقب میں سری لنکن اوپنرز نے زمبابوین باؤلرز کو کسی موقع نہ دیا۔

صرف ایک وکٹ کے نقصان پر 16.2 اوورز میں ہی ہدف حاصل کر لیا گیا۔ کامل مشرا 12 رنز بنا کر آؤٹ ہوئے جبکہ کوسال مینڈس 25 رنز کے ساتھ ناٹ آؤٹ رہے۔

میچ کے ہیرو پاتھم نسانکا نے شاندار بیٹنگ کرتے ہوئے 98 رنز کی دھواں دار اننگز کھیلی جس میں 11 چوکے اور 4 چھکے شامل تھے۔ انہیں شاندار کارکردگی پر پلیئر آف دی میچ کا اعزاز ملا۔

سیریز کی صورت حال دلچسپ مرحلے میں داخل

سری لنکا کی اس جیت کے بعد صورتحال مزید سنسنی خیز ہو گئی ہے۔ اگر لنکن ٹیم اگلے میچ میں پاکستان کو شکست دے دیتی ہے تو وہ فائنل میں جگہ بنا سکتی ہے۔

سہ ملکی سیریز کا چھٹا میچ 27 نومبر کو پاکستان اور سری لنکا کے درمیان کھیلا جائے گا جبکہ فائنل 29 نومبر کو شیڈول ہے۔ قومی ٹیم پہلے ہی فائنل کے لیے کوالیفائی کر چکی ہے۔