واشنگٹن: امریکا نے افغان پاسپورٹ ہولڈرز کے ویزے اور اسائلم درخواستوں پر فیصلے فوری طور پر روک دیے ہیں۔

یہ اقدام نیشنل گارڈز پر افغان شہری کی فائرنگ کے بعد صدر ڈونلڈ ٹرمپ کے احکامات کی روشنی میں اٹھایا گیاہے۔

امریکی محکمہ خارجہ کے مطابق افغان پاسپورٹ رکھنے والے تمام افراد کے لیے ویزوں کا اجرا معطل کردیا گیا ہے۔ حکام کا کہنا ہے کہ قومی سلامتی اور عوامی تحفظ کے لیے اضافی اسکریننگ ضروری ہے۔

یو ایس سٹیزن شپ اینڈ امیگریشن سروسز نے بھی پناہ گزینوں کی تمام درخواستوں پر فیصلے روکنے کا اعلان کیا ہے۔

ایجنسی کے ڈائریکٹر جوزیف ایڈلو نے کہا کہ جب تک مکمل جانچ اور زیادہ سے زیادہ اسکریننگ یقینی نہیں ہوجاتی، تمام فیصلے مؤخر رہیں گے۔

یہ اقدامات اس واقعے کے بعد سامنے آئے ہیں جس میں وائٹ ہاؤس کے قریب فائرنگ کرنے والے افغان شہری نے ایک نیشنل گارڈ کو ہلاک اور ایک کو زخمی کردیا تھا۔ مبینہ حملہ آور 2021 میں ری سیٹلمنٹ پروگرام کے تحت امریکا آیا تھا۔

اس سے پہلے صدر ڈونلڈ ٹرمپ نے اعلان کیا تھا کہ تیسری دنیا کے ممالک سے ہجرت کو مستقل طور پر محدود کیا جائے گا اور ایسے پناہ گزینوں کی شہریت منسوخ کی جاسکتی ہے جو داخلی امن کے لیے خطرہ ہوں۔

دوسری جانب امریکا میں مقیم افغان کمیونٹی نے ٹرمپ انتظامیہ سے درخواست کی ہے کہ امیگریشن اور اسائلم کیسز روکنے کا فیصلہ واپس لیا جائے، کیونکہ اس کے اثرات ہزاروں بے گھر خاندانوں پر پڑیں گے۔