بچوں کی بہتر اور اچھی صحت کے لئے ضروری ہے کہ ان کی غذا کو بہتر بنایا جائے جس میں گھر کا کھانا، پھل، سبزیاں اور مغذات شامل ہیں۔

بچوں کی نشو نما اور صحت پر اب تک بہت سی تحقیقات ہوچکی ہیں لیکن حال میں ہونے والی ایک تحقیق سے معلوم ہوا ہے کہ بچوں کی ذہنی صحت کو بنانے کے لئے پھلوں اور سبزیاں کا استعمال ضروری ہے۔

یہ تحقیق برطانیہ میں تقریباً 9000 بچوں پر کی گئی ہے جن کا تعلق پرائمری اور سیکنڈری کلاس سے تھا۔

اس تحقیق میں 50 اسکول پر مشتمل ایک بڑے سروے سے حاصل شدہ معلومات کا تجزیہ کیا گیا۔

تجزیئے سے معلوم ہوا کہ جن بچوں نے پورے دن میں پھلوں اور سبزیوں کا جتنا زیادہ استعمال کیا تھا، ان کی ذہنی اور جذباتی صلاحیتیں نمایاں طور پر سب سے بہتر تھیں۔

واضح رہے کہ اس سروے میں اوسط وزن والے ایک پھل یا ایک سبزی کو ’’ایک حصہ‘‘ (ایک پورشن) قرار دیا گیا تھا جبکہ بچوں کی روزمرہ غذائی عادات کو ایک سے پانچ پورشن تک کے حساب سے جانچا گیا تھا۔

اس حوالے سے ماہرین کا کہنا ہے کہ بچپن کے معمولات اور صلاحیتوں کے اثرات پوری زندگی ہمارے ساتھ رہتے ہیں بلکہ آگے چل کر وہ اور زیادہ نمایاں بھی ہوجاتے ہیں۔

اسی لیے ضروری ہے کہ بچپن اور لڑکپن میں کھانے پینے کے علاوہ دوسرے معمولات کو بھی عوامی صحت سے متعلق حکومتی پالیسیوں کا حصہ بنایا جائے تاکہ آنے والے نسلوں کی بہتر ذہنی و جسمانی صحت کی ضمانت دی جاسکے۔