آپ کی قسمت شاید آپ کی ہتھیلی پر لکھی ہو، تاہم آپ کی صحت کے بارے میں مختلف نشانیاں آپ کے ناخنوں سے بھی ظاہر ہوسکتی ہیں۔

کیلیفورنیا کے ایمرجنسی ڈاکٹر جو وائٹنگٹن نے اپنی ایک ٹک ٹاک ویڈیو میں امراض قلب کی ایک غیر معروف علامت کا ذکر کیا ہے ان کے مطابق اگر آپ اپنے ناخن کے نیچے دباؤ ڈالیں اور دھڑکن محسوس کریں، تو یہ علامت ہے کہ اس سے شدید قلبی مسائل پیدا ہو سکتے ہیں۔

اسے کوئنکے کی علامت کہا جاتا ہے اور یہ دھڑکن ایورٹک ریگریگٹیشن کی وجہ سے ہوتی ہے، جسے والو ریگریگٹیشن بھی کہا جاتا ہے۔
اس کا مطلب یہ ہے کہ جب خون دل سے جسم کی طرف جا رہا ہوتا ہے، تو اس کا ایک بڑا حصہ واپس دل میں آ جاتا ہے، جوکہ بہت سے مسائل کا سبب بن سکتا ہے۔

صرف امریکہ میں ہی 1 کروڑ 10 لاکھ سے زائد افراد یعنی تقریباً 2.5 فیصد آبادی دل کے والو کے کسی نہ کسی مرض میں مبتلا ہیں۔

اس مرض کی کم شدید علامت میں سینے میں درد، سانس کی کمی اور تھکاوٹ شامل ہے، تاہم، یہ بے ترتیبی والی دھڑکن (آریدھمیا)، اینڈوکارڈائٹس، جسم میں مائع کے جمع ہونے اور اچانک دل کے مرض کا باعث بھی بن سکتا ہے۔

وائٹنگٹن نے ایورٹک ریگریگٹیشن کی ایک اور جسمانی علامت کا بھی ذکر کیا ہے جس میں دھڑکن کے ساتھ گردن کی شریانوں کا نمودار ہونا ہے، یہی وجہ ہے کہ گردن اور ناخنوں کی دھڑکن پر توجہ دینا بہت ضروری ہے۔

  ایک تحقیق کے مطابق 60 سال سے زیادہ عمر کے ‘صحت مند’ بالغ افراد میں اس مرض کا خطرہ ہوتا ہے، جو دل پر اضافی دباؤ ڈالتی ہے اور امراض قلب کے خطرے کو بڑھاتی ہے،تاہم دل کے الٹراساؤنڈ سے اس بیماری کا پتا لگایا جاسکتا ہے۔