ذیابیطس میں چند ہی پھلوں کو کھانے کی اجازت دی جاتی ہے تاکہ خون میں چینی کی سطح متوازن میں رہے ان ہی میں آڑو بھی شامل ہے۔

آڑو، جسے گرم موسم کا پھل بھی کہا جاتا ہے، نہ صرف ذائقے میں بہترین ہوتا ہے بلکہ صحت کے لیے بھی بے شمار فوائد رکھتا ہے۔ یہ وٹامنز، معدنیات، اینٹی آکسیڈنٹس اور فائبر سے بھرپور ہوتا ہے، جو جسمانی صحت کو بہتر بناتا ہے۔

بہتر ہاضمہ

آڑو میں موجود فائبر نظامِ ہاضمہ کو بہتر بنانے میں مددگار ثابت ہوتا ہے۔ فائبر کی مناسب مقدار قبض سے بچاؤ میں مدد دیتی ہے اور آنتوں کی صحت کو بہتر بنانے میں مدد فراہم کرتی ہے۔ جدید تحقیق کے مطابق، آڑو کا باقاعدہ استعمال بڑی آنت کے کینسر کے خطرے کو کم کرنے میں بھی مدد گار ثابت ہوتا ہے۔

صحت مند جلد

آڑو میں موجود وٹامن سی جسے جلد دوست وٹامن کہا جاتا ہے کثیر مقدار میں موجود ہوتا ہے یہ جلد کی صحت کو بہتر بناتا ہے۔ یہ وٹامن جلد کے خلیات کی مرمت کرتا ہے اور جلد کو سورج کی روشنی سے پہنچنے والے نقصان سے بھی تحفظ فراہم کرتا ہے۔ ایک تحقیق کے مطابق آڑو میں موجود اینٹی آکسیڈنٹس جلد کو عمر رسیدگی سے بچانے میں بھی معاون ثابت ہوتا ہے۔

دل کی صحت

آڑو میں پوٹاشیم کی وافر مقدارموجود ہوتا ہے جو دل کی صحت کے لیے نہایت اہم ہے، پوٹاشیم بلڈ پریشر کو کنٹرول میں رکھتا ہے اور ہائی بلڈ پریشر کے خطرے کو کم کرتا ہے، آڑو میں موجود اینٹی آکسیڈنٹس خون کی شریانوں کی لچک کو برقرار رکھنے میں مدد فراہم کرتا ہے اور دل کے دورے کے خطرے کو کم کرتا ہے۔

بہتر بینائی

آڑو میں وٹامن اے کی موجودگی آنکھوں کی صحت کو بہتر بناتی ہے۔ یہ وٹامن بینائی کو بہتر کرنے کے ساتھ ساتھ رات کو دیکھنے کی صلاحیت کو بھی بڑھاتا ہے، اس کے علاوہ آڑو میں موجود بیٹا کیروٹین موتیا سے بچاؤ میں اہم کردار ادا کرتا ہے۔

صحت مند وزن برقرار

آڑو میں کیلوریزاور چکنائی کم ہوتی ہے یہی وجہ ہے کہ  اس کا استعمال وزن کم کرنے میں مددگار ثابت ہوسکتا ہے، خصوصاً ان افراد کے لیے جو کم کیلوریز والی غذا کھانے کو ترجیح دیتے ہیں۔

 2023  کی ایک تحقیق کے مطابق، آڑو میں موجود اینٹی آکسیڈنٹس جیسے کہ پولیفینولز اور فلاوونائڈز نہ صرف جسم کو فری ریڈیکلز سے بچاتے ہیں بلکہ کینسر جیسے سنگین امراض کے خطرے کو بھی کم کرتے ہیں۔ اس کے علاوہ، اس میں موجود وٹامن سی مدافعتی نظام کو تقویت دیتا ہے اور جسم کو بیماریوں سے لڑنے کی صلاحیت فراہم کرتا ہے۔