کراچی کے علاقے گلستان جوہر میں بھٹائی آباد میں جلوس کے شرکا علم لے جارہے تھے کہ اچانک علم  بجلی کے تاروں سے ٹکرا گیا جس کے باعث کرنٹ لگنے سے 5 افراد جھلس کر جاں بحق ہوگئے ہیں جبکہ 2 افراد کی حالت تشوشناک بتائی جارہی ہے۔

پولیس کے مطابق واقعہ 7 محرم الحرام کے جلوس کے دوران علم بجلی کی تاروں سے ٹکراگیا جس کے نتیجے میں 13 سالہ بچہ اور ایک شخص موقع پر ہی دم توڑ گیا جب کہ ایک زخمی اسپتال لے جاتے ہوئے راستے میں ہی  چل بسا، مقامی تھانے کی پولیس کا کہنا ہے کہ واقعے میں ایک اور شخص زخمی ہے جسے تشویشناک حالت میں اسپتال منتقل کردیا گیا ہے اور اس کی جان بچانے کی کوششیں کی جارہی ہیں۔

پولیس کے مطابق جاں بحق افراد کی شناخت 35 سالہ محمد علی، 13 سالہ حاجی خاصخیلی اور 18 سالہ سونو شاہ ذیب کے نام سے کرلی گئی ہے۔

دوسری جانب ترجمان کے الیکٹرک کا کہنا ہے کہ بھٹائی آباد میں پیش آنے والے واقعے پر شدید افسوس ہے۔

انہوں نے کہا کہ بھٹائی آباد میں حادثہ جلوس کے دوران علم بجلی کے تاروں سے ٹکرانے کے سبب پیش آیا جبکہ بجلی کے تار قواعد و ضوابط کے۔مطابق نصب کئے جاتے ہیں اور کے الیکٹرک کی ٹیمز جائے وقوعہ پر موجود ہیں اور جلوس انتظامیہ سے رابطے میں ہیں۔

واضح رہے کہ اس سے قبل میئر کراچی وسیم اختر نے کہا کہ  اجتماعی قتل کامقدمہ کھلی عدالت میں چلایا جائے، کسی کے خلاف نہیں، کراچی کا سسٹم ٹھیک کرنا چاہتا ہوں، جب تک نظام ٹھیک نہیں ہوگا، لوگ یوں ہی مرتے رہیں گے۔

کراچی پریس کلب میں پریس کانفرنس کرتے ہوئے میئر کراچی وسیم اختر نے کہا کہ گزشتہ بارشوں میں 40 اموات واقع ہوئی ہیں، لوگوں نے عید کی نماز کے بجائے نماز جنازہ ادا کیا ہے۔