وزیراعظم عمران خان کی زیر صدارت ملک بھر میں مہنگائی پر اعلیٰ سطحی اجلاس ہوا۔

ذرائع کے مطابق اجلاس میں ملک بھر میں مہنگائی کو کنٹرول کرنے سے متعلق مشاورت کی گئی جبکہ پرائس کنٹرول کو فعال کرنے سے متعلق بھی مشاورت کی گئی۔اجلاس میں وزیر اعظم عمران خان کا کہنا تھا کہ عوام کو زیادہ سے زیادہ ریلیف فراہم کیا جائے اور عام شہری کی مشکلات کا ازالہ کیا جائے۔

اجلاس میں ضروری اشیائے خوردونوش گندم، چینی، گھی، دالیں، پیاز اور ٹماٹر کی قیمتوں کا جائزہ اور ذخیرہ اندوزی کے خاتمے کے حوالے سے اقدامات پر تفصیلی بریفنگ دی گئی جبکہ گندم کی فراہمی، دستیابی اور قیمتوں میں اتار چڑھاؤ کو منظم رکھنے کے حوالے سے صوبہ پنجاب، صوبہ خیبر پختونخواہ اور سندھ کے اقدامات کا جائزہ بھی لی گی۔

وزیرِ اعظم نے گندم اور آٹے کی قیمت کو مستحکم رکھنے کے لیے اقتصادی رابطہ کمیٹی کوفی الفور تجاویز مرتب کرنے اور موثر فیصلے کرنے کی ہدایت کردی جبکہ ذخیرہ اندوزوں کے خلاف فوری کریک ڈاؤن کا حکم بھی جاری کردیا گیا ہے۔

وزیر اعظم نے کہا کہ جدید ٹیکنالوجی کو برؤے کار لاتے ہوئے اشیائے ضروریہ کے لئے ” درست قیمت ” اپیلیکیشن پر مبنی نظام متعارف کرایا جائے جبکہ صوبائی حکومتوں کو ایک ہفتے میں مربوط نظام وضع کرنے کی ہدایت کردی گئی۔

اجلاس میں پنجاب اور خیبرپختونخوا کے وزرائے اعلیٰ، وفاقی وزرا، معانین خصوصی سمیت سینئر حکام بھی شریک ہوئے۔